കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിന് നേരെ ഞായറാഴ്ച പുലർച്ചെ ഡ്രോൺ ആക്രമണം. വിമാനത്താവളത്തിനുള്ളിലെ കുവൈത്ത് ഏവിയേഷൻ ഫ്യൂവലിംഗ് കമ്പനിയുടെ (KAFCO) രണ്ട് ഇന്ധന ടാങ്കുകൾ ലക്ഷ്യമിട്ടാണ് ആക്രമണം നടന്നത്. ആക്രമണത്തെത്തുടർന്ന് ടാങ്കുകൾക്ക് തീപിടിച്ചെങ്കിലും വലിയ അപകടം ഒഴിവായതായും ആളപായമില്ലെന്നും അധികൃതർ സ്ഥിരീകരിച്ചു.

അടിയന്തര നടപടികളുമായി അഗ്നിശമന സേന

ആക്രമണം നടന്ന ഉടൻ തന്നെ അഗ്നിശമന സേനയും എമർജൻസി യൂണിറ്റുകളും സ്ഥലത്തെത്തി തീ നിയന്ത്രണവിധേയമാക്കി. സംഭവത്തിൽ ഭൗതികമായ നാശനഷ്ടങ്ങൾ സംഭവിച്ചിട്ടുണ്ടെങ്കിലും ജീവനക്കാർക്കോ വിമാനത്താവളത്തിലെ മറ്റ് ഉദ്യോഗസ്ഥർക്കോ പരുക്കേറ്റിട്ടില്ലെന്ന് സിവിൽ ഏവിയേഷൻ ജനറൽ അതോറിറ്റി (DGCA) വ്യക്തമാക്കി.

ALSO READ: ഇറാൻ ആക്രമണം തുടരുന്നു; കുവൈത്തിൽ ഡ്യൂട്ടിയിലിരിക്കെ രണ്ട് അതിർത്തി സുരക്ഷാ ഉദ്യോഗസ്ഥർ കൊല്ലപ്പെട്ടു

വിമാനത്താവള പ്രവർത്തനം സാധാരണ നിലയിൽ

സ്ഥിതിഗതികൾ നിയന്ത്രണവിധേയമാണെന്നും വിമാനത്താവളത്തിന്റെ പ്രവർത്തനം സുരക്ഷിതമായി തുടരുന്നുണ്ടെന്നും ഡിജിസിഎ വക്താവ് അബ്ദുല്ല അൽ-രാജ്ഹി അറിയിച്ചു. ഡിജിസിഎ പ്രസിഡന്റ് ഷെയ്ഖ് ഹമൂദ് മുബാറക് അൽ ഹമൂദ് അൽ സബാഹ് നേരിട്ട് സ്ഥലത്തെത്തി സുരക്ഷാ ക്രമീകരണങ്ങൾക്കും ഏകോപന പ്രവർത്തനങ്ങൾക്കും നേതൃത്വം നൽകി.

ആക്രമണത്തിന് പിന്നിലെ ഉറവിടത്തെക്കുറിച്ചോ ഇന്ധന ടാങ്കുകൾക്കുണ്ടായ നാശനഷ്ടങ്ങളുടെ കൃത്യമായ വ്യാപ്തിയെക്കുറിച്ചോ ഉള്ള അന്വേഷണം പുരോഗമിക്കുകയാണ്. മേഖലയിൽ സംഘർഷം നിലനിൽക്കുന്ന പശ്ചാത്തലത്തിൽ വിമാനത്താവളത്തിൽ സുരക്ഷാ നിരീക്ഷണം ശക്തമാക്കിയിട്ടുണ്ട്.

reports say iran launched a drone attack targeting kuwait international airport, causing a fire in nearby fuel storage tanks. authorities are assessing the damage while security forces remain on high alert amid escalating tensions in the gulf region.