കല്‍പ്പറ്റ: ഉരുളെടുത്ത ദുരന്തത്തില്‍ സ്വന്തം ജീവനപ്പോലെ സ്‌നേഹിച്ചിരുന്ന ജീപ്പ് നശിച്ചപ്പോള്‍ നിയാസിന് വലിയ സങ്കടമായിരുന്നു. എന്നാല്‍ നിയാസിന് പുതിയ വാഹനം നല്‍കുമെന്ന് അറിയിച്ച് യൂത്ത് കോണ്‍ഗ്രസ്. ചൂരല്‍മല സ്വദേശി നിയാസിന്റെ ജീവിത മാര്‍ഗമായിരുന്ന 'വായ്പ്പാടന്‍' എന്ന ജീപ്പാണ് ഉരുള്‍ കൊണ്ടുപോയത്.

ഉപജീവനത്തിനായി മറ്റുമാര്‍ഗങ്ങളില്ലാതെ പകച്ചുനില്‍ക്കുന്ന നിയാസിന് മുന്നിലേക്കാണ് യൂത്ത് കോണ്‍ഗ്രസിന്റെ സഹായഹസ്തമെത്തിയത്. നിയാസിന് വാഹനത്തോടുള്ള വൈകാരികത നമുക്ക് മനസ്സിലാവുമെന്നും ഉടന്‍ തന്നെ വാഹനം വാങ്ങി നല്‍കുമെന്നുമാണ് യൂത്ത് കോണ്‍ഗ്രസ് സംസ്ഥാന അധ്യക്ഷന്‍ രാഹുല്‍ മാങ്കൂട്ടത്തില്‍ നിയാസിനെ അറിയിച്ചത്. പരപ്പനങ്ങാടിയിലെ വാട്‌സ്ആപ്പ് കൂട്ടായ്മയായ ഫണ്ണീസും പകുതി പണം നല്‍കാമെന്ന് അറിയിച്ചിട്ടുണ്ട്.

'ഇത്രയും കാലം പൊന്നുപോലെ കൊണ്ടുനടന്ന വണ്ടി. മൂന്നരകൊല്ലത്തിനടുത്തായി വണ്ടിവാങ്ങിയിട്ട്. പതുക്കെ ഓടി ലോണ്‍ അടച്ച് തീര്‍ന്നുവന്നതേയുള്ളൂ. എനിക്ക് വാഹനം വാങ്ങാനുള്ള കഴിവ് ഇല്ലാത്തതിനാല്‍ ഏട്ടനാണ് വാങ്ങിതന്നത്. തകര്‍ന്ന വണ്ടിയിലേക്ക് എനിക്ക് നോക്കാന്‍ പോലും സാധിക്കുന്നില്ല. മാത്രമല്ല, വീടും ഇല്ല. കൂടെപിറപ്പിനെപ്പോലെയായിരുന്നു ആ വണ്ടി. അതുകൊണ്ട് വീട്ടുകാര്‍ക്കും വലിയ സങ്കടമാണ്.

വണ്ടി കൂടെ ഉണ്ടായിരുന്നപ്പോള്‍ ഒരു സമാധാനമായിരുന്നുവെന്നും ഞാന്‍ ആദ്യംവാങ്ങിയ വാഹനം ആക്ടീവയായിരുന്നുവെന്നും അത് ഇപ്പോള്‍ ഉപയോഗിക്കാനാവില്ലെന്നും സ്റ്റാര്‍ട്ട് ആക്കാന്‍ പോലും കഴിയില്ലെന്നും ഒരു വൈകാരികതയുടെ പുറത്ത് സൂക്ഷിക്കുകയാണെന്നും നിയാസ് പറയുന്നു. ആരും പ്രയാസം അനുഭവിക്കുകയില്ല. നിയാസിന് വാഹനം വാങ്ങാന്‍ എത്ര തുകയാണോ വേണ്ടത് അത് യൂത്ത് കോണ്‍ഗ്രസ് നല്‍കുന്നതാണ്. ഗംഭീരമായ ജീപ്പ് തന്നെ നല്‍കും- എന്നായിരുന്നു രാഹുലിന്റെ പ്രതികരണം. തന്റെ ഉപജീവനമാര്‍ഗമായ വാഹനം തിരിച്ചുകിട്ടുന്നതില്‍ വളരെയധികം സന്തോഷവാനാണ്  നിയാസ്.