ഇംഫാല്‍: മണിപ്പൂരിലെ കാങ്പോപി ജില്ലയിലുണ്ടായ ബോംബ് സ്ഫോടനത്തില്‍ മുന്‍ എം.എല്‍.എയുടെ ഭാര്യ കൊല്ലപ്പെട്ടു. സൈകുല്‍ മുന്‍ എം.എല്‍.എ യാംതോങ് ഹാക്കിപ്പിന്റെ വീടിന് സമീപത്താണ് ബോംബ് സ്ഫോടനം ഉണ്ടായത്. സ്ഫോടനത്തില്‍ പരുക്കേറ്റ ഹാക്കിപ്പിന്റെ ഭാര്യ സപം ചാരുബാലയെ സൈകുലിലെ ആരോഗ്യ കേന്ദ്രത്തിലേക്ക് കൊണ്ടുപോയെങ്കിലും രക്ഷിക്കാനായില്ല. സ്ഫോടനം നടക്കുമ്പോള്‍ ഹാക്കിപ്പ് വീട്ടിലുണ്ടായിരുന്നെങ്കിലും രക്ഷപ്പെട്ടു.

സംഭവത്തില്‍ പൊലിസ് അന്വേഷണം നടത്തിവരികയാണ്. കുടുംബ വഴക്കാണ് ആക്രമണത്തിന് കാരണമെന്നാണ് പൊലിസിന്റെ പ്രാഥമിക നിഗമനം. അടുത്തിടെ സ്വത്ത് വിഹിതവുമായി ബന്ധപ്പെട്ട് കുടുംബാംഗങ്ങള്‍ തമ്മില്‍ തര്‍ക്കങ്ങളുണ്ടായിരുന്നതായി പൊലിസ് പറഞ്ഞു.