കാളികാവ്: ചോക്കാട് പ്രാഥമികാരോഗ്യകേന്ദ്രത്തില്‍ മോഷണം. ആശുപത്രിയില്‍ സ്ഥാപിച്ച ടിവിയുടെ അനുബന്ധ ഉപകരണങ്ങളാണു കളവു പോയിട്ടുള്ളത്. തിങ്കളാഴ്ച ആശുപത്രിയില്‍ തിരക്കു കൂടുതലായിരുന്നു. തിരക്കിനിടയില്‍ മോഷണം നടന്നതാവുമെന്നാണ് ആശുപത്രി അധികൃതര്‍ പറയുന്നത്.
 ചോക്കാട് നാല്പത് സെന്റ് ആദിവാസി കോളനിയോടു ചേര്‍ന്നാണ് ആശുപത്രിയുള്ളത്.  ചികിത്സ തേടിയെത്തുന്നവര്‍ക്കായിട്ടുള്ള ടി.വിയാണിത്.
കേബിള്‍ കണക്ഷനുള്‍പ്പെടെയുള്ള ഉപകരണങ്ങള്‍ മോഷണം പോയതിനാല്‍ ടിവിയുടെ പ്രവര്‍ത്തനവും മുടങ്ങിയിരിക്കുകയാണ്. മോഷണത്തിനു പിന്നിലുള്ളവരെ പിടികൂടണമെന്ന് ആശുപത്രി സന്ദര്‍ശിച്ച ചോക്കാട് ഗ്രാമപഞ്ചായത്ത് പ്രസിഡന്റ് ഷാഹിന ഗഫൂര്‍, കാളികാവ് ബ്ലോക്ക് പഞ്ചായത്തംഗം പൈനാട്ടില്‍ അഷ്‌റഫ് എന്നിവര്‍ ആവശ്യപ്പെട്ടു.
സംഭവവുമായി ബന്ധപ്പെട്ട് പരാതി നല്‍കിയിട്ടുണ്ട്.