തിരൂര്‍: പ്രായപൂര്‍ത്തിയാകാത്ത വിവാഹിതയായ പെണ്‍കുട്ടിയെ തട്ടിക്കൊണ്ടുപോയി പീഡിപ്പിച്ചെന്ന കേസില്‍ നിലമ്പൂര്‍ സ്വദേശിയായ യുവാവ് അറസ്റ്റില്‍. നിലമ്പൂര്‍ പൂക്കോട്ടുംപാടം ചെട്ടിപ്പാടം കളത്തില്‍ അപ്പുണ്ണിയുടെ മകന്‍ സുധീഷി(23)നെയാണ് തിരൂര്‍ പൊലിസ് ഗൂഢല്ലൂരില്‍നിന്നു കസ്റ്റഡിയിലെടുത്തത്.
ഇയാളെ കോടതി റിമാന്‍ഡ് ചെയ്തു. പതിനേഴ് വയസുകാരിയായ പൂക്കോട്ടുംപാടം സ്വദേശിനിയുടെ ഭര്‍ത്താവിന്റെ ബന്ധുക്കള്‍ നല്‍കിയ പരാതിയിലാണ് നടപടി. പെണ്‍കുട്ടിയെ കാണാനില്ലെന്നു ചമ്രവട്ടം പെരുന്തല്ലൂരിലെ ഭര്‍ത്താവിന്റെ ബന്ധുക്കളാണ് ഈ മാസം 21ന് പൊലിസില്‍ പരാതി നല്‍കിയത്. തുടര്‍ന്ന് തിരൂര്‍ സി.ഐ എം.കെ ഷാജിയുടെ നേത്യത്വത്തിലുള്ള പൊലിസ് നടത്തിയ അന്വേഷണത്തിലാണ് പെണ്‍കുട്ടിയുമൊത്ത് സുധീഷ് പിടിയിലായത്. യുവാവുമായി പ്രണയത്തിലായിരുന്ന പെണ്‍കുട്ടിയുടെ വിവാഹം ഒന്നര മാസം മുന്‍പാണ് നടന്നത്.
ഇതിനു ശേഷം പെണ്‍കുട്ടി ഭര്‍തൃവീട്ടില്‍നിന്നു യുവാവിനൊപ്പം പോയതായാണ് കേസ്. പ്രായപൂര്‍ത്തിയാകാത്ത പെണ്‍കുട്ടിയുടെ വിവാഹം നടത്തിയതിനു സ്‌പെഷല്‍ മാരേജ് ആക്ട് പ്രകാരം രക്ഷിതാക്കള്‍ക്കെതിരേയും കേസെടുക്കുമെന്നു പൊലിസ് അറിയിച്ചു.