പടന്ന: സ്‌കൂള്‍ വിദ്യാര്‍ഥികള്‍ക്കിടയില്‍ വിതരണത്തിന് കൊണ്ടുവന്ന കഞ്ചാവുമായെത്തിയ യുവാവിനെ നാട്ടുകാര്‍ പിടികൂടി പൊലിസിലേല്‍പിച്ചു. ഒരാള്‍ ഓടി രക്ഷപെട്ടു. പടന്ന തായലെ ബസാറിലെ സാജിദ് (32) നെയാണ് പടന്ന ജാഗ്രത സമിതി പ്രവര്‍ത്തകര്‍ പിടി കുടി പൊലിസിലേല്‍പ്പിച്ചത്. ജില്ലയിലെ പ്രധാന വിതരണക്കാരനായ നൂര്‍ മുഹമ്മദാണ് ഓടി രക്ഷപെട്ടത്. പടന്നയിലെ ചില വിദ്യാലയങ്ങളില്‍ വിതരണത്തിന് കൊണ്ടുവന്ന എട്ട് ചെറിയ പൊതികളും പിടിച്ചെടുത്തു.
വിതരണ സംഘത്തിലെ  കണ്ണിയായ യുവാവിഉെപയോഗിച്ചാണ് സാജിദിനെ നാടകീയമായി പിടികൂടിയത്. സമിതി പ്രവര്‍ത്തകര്‍ സ്വരൂപിച്ച 3500 രൂപ യുവാവിന് കൈമാറുകയും ഇയാള്‍ വിവരം നല്‍കിയതിനെ തുടര്‍ന്ന് ബുധനാഴ്ച ഒരു മണിക്ക് ചെറുവത്തൂര്‍ റെയില്‍വേ സ്റ്റേഷന്‍ പരിസരത്ത് എത്താന്‍ ആവശ്യപെടുകയായിരുന്നു.
 രണ്ട് തവണ സ്ഥലം മാറ്റി പറയുകയും ഒടുവില്‍ ബസ് സ്റ്റാന്‍ഡ് കെട്ടിടത്തിന്റെ മുകളില്‍ എത്താന്‍ ആവശ്യപെട്ടതിനെ തുടര്‍ന്ന് യുവാവ്  ജാഗ്രത സമിതി പ്രവര്‍ത്തകര്‍ക്ക് വിവരം നല്‍കുകയായിരുന്നു.
ഇതേ തുടര്‍ന്ന് കെട്ടിടത്തിന് മുകളില്‍ വെച്ച് കഞ്ചാവ് പൊതി കൈമാറുന്നതിനിടെ നാട്ടുകാരുടെ സഹായത്തോടെ പിടികൂടി പൊലിസിലേല്‍പിച്ചു. കഞ്ചാവും മദ്യവും ലഹരി ഉല്‍പന്നവും പടന്നയുടെ ഉറക്കം കെടുത്തിയതോടെ സന്നദ്ധ സംഘടനകള്‍ ചേര്‍ന്നാണ് ജാഗ്രത സമിതി രൂപീകരിച്ചത്. കഴിഞ്ഞ ദിവസം വടക്കെപ്പുറത്ത് നിന്നും രണ്ട് അന്യസംസ്ഥാന തൊഴിലാളികളേയും കഞ്ചാവ് വിതരണത്തിനിടെ പിടികൂടി പൊലിസില്‍ ഏല്‍പിച്ചിരുന്നു.