ദുബൈ: ദുബൈയിലെ നിരത്തുകളിൽ ഭാരവാഹനങ്ങളെ നിരീക്ഷിക്കാൻ റോഡ്‌സ് ആൻഡ് ട്രാൻസ്പോർട് അതോറിറ്റി (ആർ.ടി.എ). ദുബൈ പൊലിസ് സംയുക്ത പട്രോൾ യൂനിറ്റുകൾ തുടങ്ങി. ശൈഖ് മുഹമ്മദ് ബിൻ സാ യിദ് റോഡ്, എമിറേറ്റ്സ് റോഡ്, അൽ ഖൈൽ റോഡ്, റാസൽ ഖോർ റോഡ്, അൽ മക്തൂം എയർപോർട്ട് റോഡ്, ദുബൈ- അൽ ഐൻ റോഡ് എന്നിവിടങ്ങളിലാണ് നിരീക്ഷണം നടത്തുന്നത്. 

ഗതാഗത സുരക്ഷ ഉറപ്പു വരുത്തുന്നതിനുള്ള ആർ.ടി.എ-പൊലിസ് പഞ്ചവത്സര പദ്ധതിയുടെ ഭാഗമായാണ് നടപടിയെന്ന് ദുബൈ പൊലിസ് ഓപറേഷൻസ് വിഭാഗം അസി. കമാൻഡൻ്റ് മേജർ ജനറൽ അബ്ദുല്ല അലി അൽ ഗസ്തി പറഞ്ഞു. ഗതാഗത നിരീക്ഷണം, നിയമ നിർവഹണം, റോഡ്-വാഹന എൻജിനീയറിങ്, ഗതാഗത ബോധവൽകരണം, മാനേജ്മെൻ്റ് സംവിധാനത്തിന്റെ പുരോഗതി എന്നീ നാല് മേഖലകൾക്കാണ് പ്രാധാന്യം നൽകുന്നതെന്ന് അദ്ദേഹം വ്യക്തമാക്കി.

അപകടങ്ങൾ ഒഴിവാക്കുന്നതിന് നിയമപാലനം, വേഗ പരിധി പാലിക്കൽ, രണ്ട് വാഹനങ്ങൾക്കിടയ്ക്കുള്ള അകലം സൂക്ഷിക്കൽ, ബ്രേക്ക് പരിശോധന, ടയർ സുരക്ഷ എന്നിവ പ്രധാനമാണെന്നും അദ്ദേഹം ചൂണ്ടിക്കാട്ടി. നിയമ ലംഘനം നടത്തിയാൽ പൊലിസ് കർശന നടപടി സ്വീകരിക്കുമെന്നും പിഴ ചുമത്തുമെന്നും ആർ.ടി.എ ഗതാഗത റോഡ് ഏജൻസി സി.ഇ.ഒ ഹുസൈൻ അൽ ബന്ന മുന്നറിയിപ്പ് നൽകി. അഡ്‌നോക് സഹകരണ ത്തോടെ ആറിടങ്ങളിൽ 10 ട്രക്ക് സ്റ്റോപ്പുകൾ നിർമിച്ചതായി അദ്ദേഹം വെളിപ്പെടുത്തി. ആറെണ്ണം കൂടി നിർമിക്കും. ഓരോ സ്റ്റോപ്പിലും 5000 മുതൽ 10000 വരെ സ്ക്വയർ മീറ്റർ സ്ഥലമുണ്ടാകും. 30 മുതൽ 45 വരെ ട്രക്കുകൾക്ക് ഇവിടെ പാർക്ക് ചെയ്യാനാകും. പ്രാർഥനാ മുറി, വിശ്രമ സ്ഥലം, ഇന്ധനം നിറയ്ക്കാനുള്ള സൗകര്യം എന്നിവയും ഉണ്ടാകുമെന്നും ഹുസൈൻ അൽ ബന്ന വിശദീകരിച്ചു.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക