കൊച്ചി: സി.പി.എം പാര്‍ട്ടി കോണ്‍ഗ്രസിന് മുന്നോടിയായുള്ള ലോക്കല്‍ സമ്മേളനങ്ങളിലും ചര്‍ച്ചയാകുന്നത് എല്‍.ഡി.എഫ് സ്വതന്ത്ര എം.എല്‍.എ പി.വി അന്‍വറും എ.ഡി.ജി.പി എം.ആര്‍ അജിത് കുമാറും ഉയര്‍ത്തിയ വിവാദങ്ങള്‍. പ്രാദേശിക ചര്‍ച്ചകള്‍ക്ക് പ്രാമുഖ്യം നല്‍കുന്ന ബ്രാഞ്ച് സമ്മേളനങ്ങളില്‍ പ്രധാനമായും ഉയര്‍ന്നത് സര്‍ക്കാരും ആഭ്യന്തര വകുപ്പുമായി ബന്ധപ്പെട്ട വിവാദങ്ങളായിരുന്നു. എന്നാല്‍ എ.ഡി.ജി.പി അജിത് കുമാറിന്റെ ആര്‍.എസ്.എസ് ബന്ധവും പി.വി അന്‍വര്‍ ഉയര്‍ത്തിയ ആരോപണങ്ങളും സമ്മേളന ചര്‍ച്ചകളുടെ ഭാഗമായി മാറുകയാണ്.

അന്‍വര്‍ പൊലിസ് ഉദ്യോഗസ്ഥര്‍ക്കും മുഖ്യമന്ത്രിയുടെ പൊളിറ്റിക്കല്‍ സെക്രട്ടറി പി. ശശിക്കും എതിരേ ഉയര്‍ത്തിയ ആരോപണങ്ങള്‍ക്ക് പാര്‍ട്ടി പ്രവര്‍ത്തകര്‍ക്കിടയില്‍ വലിയ പിന്തുണയാണ് ലഭിക്കുന്നത്. പാര്‍ട്ടി സമ്മേളനങ്ങളെ ലക്ഷ്യമാക്കിയാണ് അന്‍വര്‍ വിവാദങ്ങളുമായി എത്തിയതെന്ന് വിലയിരുത്തി സി.പി.എം നേതൃത്വം അദ്ദേഹം ഉന്നയിച്ച പരാതികള്‍ അവഗണിച്ചു നീങ്ങുകയായിരുന്നു. എന്നാല്‍ പിന്നീട് അന്‍വര്‍ മുഖ്യമന്ത്രിക്കും സര്‍ക്കാരിനും എതിരേ രംഗത്തുവന്നതോടെ ശക്തമായ പ്രതിരോധം തീര്‍ക്കേണ്ട അവസ്ഥയിലാണ് പാര്‍ട്ടി. അന്‍വറിനെതിരേ മലപ്പുറത്തിനു പുറത്തും പ്രാദേശിക കമ്മിറ്റികളുടെ നേതൃത്വത്തില്‍ പ്രകടനങ്ങളും പ്രചാരണങ്ങളും നടത്താന്‍ സി.പി.എം നേതൃത്വം നിര്‍ദേശം നല്‍കിയത് പ്രതിരോധത്തിന്റെ ഭാഗമായാണ്.

അന്‍വര്‍ മുഖ്യമന്ത്രി പിണറായി വിജയനെതിരേ രംഗത്തുവന്നതിന് തൊട്ടുപിന്നാലെ സംസ്ഥാന സെക്രട്ടറി എം.വി ഗോവിന്ദന്‍ അന്‍വര്‍ രാഷ്ട്രീയ എതിരാളികളുമായി ചേര്‍ന്ന് സര്‍ക്കാരിനെയും മുന്നണിയെയും തകര്‍ക്കാനാണ് ശ്രമിക്കുന്നതെന്ന് കുറ്റപ്പെടുത്തി. ഇതോടെ പാര്‍ട്ടി കീഴ്ഘടകങ്ങള്‍ അന്‍വര്‍ വിരുദ്ധ നിലപാടുമായി രംഗത്തെത്തി. കഴിഞ്ഞ ദിവസങ്ങളില്‍ സംസ്ഥാന വ്യാപകമായി പ്രതിഷേധ പ്രകടനങ്ങള്‍ നടന്നു. ഒപ്പം സമൂഹമാധ്യമ കാംപയിനും ശക്തമാക്കി.

സി.പി.എമ്മിനുള്ളില്‍ സ്വതന്ത്ര ചര്‍ച്ച നടക്കുന്ന സമ്മേളനങ്ങളില്‍ അന്‍വര്‍ ഉയര്‍ത്തിയ വിഷയങ്ങള്‍ ചര്‍ച്ച ചെയ്യപ്പെടുമെന്നത് വലിയ വെല്ലുവിളി തന്നെയാണ്. എ.ഡി.ജി.പി അജിത് കുമാര്‍ ആര്‍.എസ്.എസ് നേതാക്കളുമായി ചര്‍ച്ച നടത്തിയതും മുഖ്യമന്ത്രി അജിത് കുമാറിനെ സംരക്ഷിക്കുന്ന നിലപാട് സ്വീകരിക്കുന്നതും ചര്‍ച്ചയാണ്. ന്യൂനപക്ഷ വിഭാഗങ്ങളെ പാര്‍ട്ടിയില്‍ നിന്ന് അകറ്റാന്‍ ഇത് കാരണമാകുമെന്നും പ്രതിപക്ഷത്തിന് രാഷ്ട്രീയ ആയുധമായി മാറുന്നുവെന്നുമാണ് സമ്മേളനങ്ങളിലെ വിലയിരുത്തല്‍.

പാര്‍ട്ടിയും സര്‍ക്കാരും അന്‍വര്‍, എ.ഡി.ജി.പി വിഷയങ്ങളില്‍ എടുത്ത നിലപാടുകള്‍ ഏരിയാ- ജില്ലാ നേതാക്കള്‍ ലോക്കല്‍ സമ്മേളനങ്ങളില്‍ വിശദീകരിക്കും. അന്‍വറും പ്രതിപക്ഷവും ഉയര്‍ത്തുന്ന വെല്ലുവിളി രാഷ്ട്രീയമായി നേരിടാനാണ് പാര്‍ട്ടി നേതൃത്വത്തിന്റെ തീരുമാനം. എ.ഡി.ജി.പിക്കെതിരേ അന്വേഷണം നടക്കുന്നത് സമ്മേളനങ്ങളില്‍ ചൂണ്ടിക്കാട്ടും. പി. ശശിക്കെതിരായ ആരോപണങ്ങള്‍ പാര്‍ട്ടിയില്‍ ഭിന്നിപ്പ് സൃഷ്ടിക്കാനും പാര്‍ട്ടിയെ ജനങ്ങള്‍ക്ക് മുന്നില്‍ മോശമാക്കാനുമുള്ള നീക്കത്തിന്റെ ഭാഗമായി കാണാനുമാണ് തീരുമാനം. ഇത് അണികളെ ബോധ്യപ്പെടുത്തി സമ്മേളനം പാര്‍ട്ടി ശക്തിപ്പെടുത്താനുള്ള വിഷയങ്ങളില്‍ കേന്ദ്രീകരിക്കാനാണ് കീഴ്ഘടകങ്ങള്‍ക്ക് നല്‍കിയിരിക്കുന്ന നിര്‍ദേശം.

Amid ongoing local conferences leading up to the CPM party congress, controversies involving independent MLA P.V. Anwar and ADGP M.R. Ajith Kumar have dominated discussions. The party leadership is rallying to counter the allegations and maintain party integrity.