ദുബൈ: അമേരിക്കൻ അക്കാദമി ഓഫ് പ്രൊഫഷണൽ കോഡേഴ്സുമായി (എ.എ.പി.സി) സഹകരിച്ച് ഗൾഫ് മെഡിക്കൽ യൂണിവേഴ്സിറ്റി (ജി.എം.യു) പുതിയ മെഡിക്കൽ കോഡിംഗ്, ബില്ലിംഗ് പ്രൊഫഷണൽ കോഴ്‌സ് പ്രഖ്യാപിച്ചു. യു.എ.ഇയുടെ മുൻ ആരോഗ്യ, വിദ്യാഭ്യാസ മന്ത്രി ഹുമൈദ് മുഹമ്മദ് ഉബൈദ് അൽ ഖുതാമി മുഖ്യാതിഥിയായി സംബന്ധിച്ച ദുബൈ ഗ്രാൻഡ് ഹയാത്തിൽ തുംബെ ഹെൽത്ത്‌ കെയർ ഒരുക്കിയ 'ഇൻഷുറൻസ് മീറ്റ് 2024'ലാണ് പ്രഖ്യാപനമുണ്ടായത്. കോഴ്‌സ് വിശദാംശങ്ങൾ ജി.എം.യു ചാൻസലർ പ്രൊഫ. ഹുസാം ഹംദി വിശദീകരിച്ചു. 

ദുബൈ ഹെൽത്ത്‌ കെയർ അതോറിറ്റി(ഡി.എച്ച്.എ)യുടെ ഗവൺമെൻ്റ് റെഗുലേറ്റർമാർക്കൊപ്പം അന്തർദേശീയ, തദ്ദേശ ഇൻഷുറൻസ് കമ്പനികളിൽ നിന്നുള്ള പ്രതിനിധികളാണ് ഇൻഷുറൻസ് മീറ്റിൽ പങ്കെടുതത്തത്.

2025ൻ്റെ തുടക്കത്തിൽ രാജ്യവ്യാപകമായി നിർബന്ധിത ആരോഗ്യ ഇൻഷുറൻസ് പദ്ധതിക്കായി യു.എ.ഇ തയാറെടുക്കുന്ന സന്ദർഭത്തിലാണ് ഇൻഷുറൻസ് മീറ്റ് നടത്തിയത്. 2025 ജനുവരിയിൽ രാജ്യവ്യാപകമായി നിർബന്ധിത ആരോഗ്യ ഇൻഷുറൻസ് പദ്ധതി നടപ്പിലാക്കാൻ യു.എ.ഇ തയാറെടുക്കുമ്പോൾ ആർട്ടിഫിഷ്യൽ ഇൻ്റലിജൻസ് (എ.ഐ) സാധ്യതകൾ ഇൻഷുറൻസ് മേഖലയുടെ സേവനം ഫലപ്രദമായി രൂപപ്പെടുത്താൻ സഹായിയ്ക്കുന്ന വിഷയങ്ങൾ സമ്മേളനം ചർച്ച ചെയ്‌തു. 

എ.ഐ സാധ്യതകൾ ഇൻഷുറൻസ് വ്യവസായത്തെ പരിഷ്കരിക്കുമെന്നും, വ്യക്തികൾക്ക്  സുസ്ഥിരവും തുല്യവുമായ ആരോഗ്യ പരിരക്ഷാ സംവിധാനത്തിന് പ്രയോജനപ്പെടുമെന്നും

തുംബെ ഹെൽത്ത്‌ കെയർ വൈസ് പ്രസിഡണ്ട് അക്ബർ മൊയ്തീൻ തുംബെ പറഞ്ഞു. 

സ്വകാര്യ മേഖലയിൽ രജിസ്റ്റർ ചെയ്തിട്ടുള്ള എല്ലാ ജീവനക്കാർക്കും, നിലവിൽ കവറേജില്ലാത്ത വീട്ടുജോലിക്കാർക്കും അവശ്യ ആരോഗ്യ സേവനങ്ങൾ ലഭിക്കുന്നതാണ് പുതിയ നിർബന്ധിത ഇൻഷുറൻസ് പദ്ധതി. 2025 ജനുവരി മുതൽ വിസ നൽകുമ്പോഴും പുതുക്കുമ്പോഴും തൊഴിലുടമകൾ ആരോഗ്യ ഇൻഷുറൻസ് നൽകണം. യു.എ.ഇയിൽ എല്ലാവർക്കും തുല്യമായ ആരോഗ്യ പരിരക്ഷാ അന്തരീക്ഷം പ്രദാനം ചെയ്യുന്നതാണ് ഈ പദ്ധതി.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക