അബൂദബി: അബൂദബിയിൽ ആരോഗ്യ ഇൻഷുറൻസ് നിരക്കുകൾ വർധിപ്പിച്ചതോടെ പ്രവാസി കുടുംബങ്ങൾ ഏറെ ബുദ്ധിമുട്ടിലാകുന്നു. 41 വയസ്സിനു മുകളിൽ പ്രായമുള്ളവർക്കും 60 വയസ്സ് കഴിഞ്ഞവർക്കും പ്രതിവർഷം ആരോഗ്യ ഇൻഷുറൻസിനായി ഭീമമായ തുക നൽകേണ്ടിവരുന്നു. 60 വയസ്സിന്മുകളിലുള്ളവരുടെ ബേസിക് ഇൻഷുറൻസ് പാക്കേജ് നേരത്തേ 900 ദിർഹമായിരുന്നെങ്കിൽ, ഇപ്പോൾ ഇത് 9,000 ദിർഹമാക്കി ഉയർത്തി, ചില കമ്പനികൾ ഇത് 16,000 ദിർഹം വരെ കൂട്ടിയിരിക്കുകയാണ്. 

ഇൻഷുറൻസ് പ്രീമിയം കൂടിയതോടെ ചില തൊഴിലുടമകൾ ആശ്രിതർക്കായുള്ള ഇൻഷുറൻസ് തുക നൽകാത്തതായി അറിയിക്കുകയും, ജീവനക്കാർക്ക് കുടുംബത്തെ നാട്ടിലേക്ക് അയക്കാനോ അല്ലെങ്കിൽ സ്വന്തം ചെലവിൽ ഇൻഷുറൻസ് എടുക്കാനോ നിർദേശം നൽകുകയും ചെയ്തു. ഇതിൽ ഏറ്റവും വലിയ തിരിച്ചടിയിലായിരിക്കുന്നത് ഒരാൾ മാത്രം ജോലി ചെയ്യുന്ന കുടുംബങ്ങളാണ്, പ്രതിവർഷം ഇരുപതിനായിരത്തോളം ദിർഹം അധികമായി കണ്ടെത്തേണ്ട അവസ്ഥയാണ്.

ഇൻഷുറൻസ് ഇല്ലെങ്കിൽ യുഎഇയിൽ വീസ ഇല്ല

ജനുവരി 1 മുതൽ അബൂദബി ഉൾപ്പെടെ യുഎഇയിലെ സ്വകാര്യ മേഖലയിൽ ജോലി ചെയ്യുന്നവർക്ക് ഇൻഷുറൻസ് നിർബന്ധമാക്കിയതോടെ, ഇൻഷുറൻസ് ഇല്ലെങ്കിൽ വീസ പുതുക്കാനും പുതിയ വീസ എടുക്കാനും സാധിക്കില്ല.  യുഎഇയിലെ വിവിധ എമിറേറ്റുകളിലേക്ക് ഈ നിർബന്ധിത ഇൻഷുറൻസ് പദ്ധതി വ്യാപിപ്പിക്കുന്നതോടെ, തൊഴിലുടമകൾക്കും ജീവനക്കാർക്കും കൂടുതൽ സാമ്പത്തിക ബാധ്യതകൾ നേരിടേണ്ടിവരുമെന്ന് പ്രവാസികൾ പറയുന്നു. 

പ്രവാസികൾക്ക് ചെറിയ പ്രീമിയത്തിൽ ലഭിക്കുന്ന ഇൻഷുറൻസ്, ഏറെ നിയന്ത്രണങ്ങളോടെ കിട്ടുമ്പോൾ, സമാന്യമായ ആരോഗ്യ സേവനങ്ങൾക്കായി കൂടുതൽ തുക നൽകേണ്ടിവരുന്ന അവസ്ഥയിലായിരിക്കുന്നു. 18 വയസ്സിനു മുകളിൽ പ്രായമുള്ള യുവതികൾക്ക് "മറ്റേണിറ്റി പ്രീമിയം" എന്ന പേരിൽ 1,000 ദിർഹം കൂടി നൽകേണ്ടിവരുന്ന സാഹചര്യം കൂടി കുടുംബങ്ങൾക്കും തൊഴിൽ ചെയ്യുന്ന പ്രവാസികൾക്കും വലിയ സാമ്പത്തിക ബാധ്യതയാകുന്നു.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക