ന്യൂഡല്‍ഹി: വിവാദമായ പൗരത്വനിയമഭേദഗതി (സി.എ.എ)ക്കെതിരായ പ്രക്ഷോഭകര്‍ക്ക് നേരെ ഹിന്ദുത്വവാദികള്‍ അഴിച്ചുവിട്ട വംശീയ കലാപവുമായി ബന്ധപ്പെടുത്തി അറസ്റ്റ്‌ചെയ്ത വിദ്യാര്‍ഥി നേതാക്കളായ ഉമര്‍ ഖാലിദിന്റെയും ഷര്‍ജീല്‍ ഇമാമിന്റെയും ജാമ്യാപേക്ഷ പരിഗണിക്കുന്നത് ഡല്‍ഹി ഹൈക്കോടതി മാറ്റി. നവംബര്‍ 25ലേക്കാണ് മാറ്റിയത്. ജസ്റ്റിസുമാരായ നവീന്‍ ചൗള, ഷാലിന്ദര്‍ കൗര്‍ എന്നിവരടങ്ങിയ ഡിവിഷന്‍ ബെഞ്ചാണ് ഹരജി പരിഗണിക്കേണ്ടിയിരുന്നത്. 

ഒന്നിലധികം തവണയാണ് ഉമര്‍ ഖാലിദിന്റെതടക്കമുള്ള ജാമ്യാപേക്ഷ വിവിധ കോടതികള്‍ തള്ളിയത്. 2020 ഫെബ്രുവരിയില്‍ വടക്കു-കിഴക്കന്‍ ഡല്‍ഹിയിലുണ്ടായ വംശീയ കലാപത്തിലെ മുഖ്യ ആസൂത്രകരാണ് ഉമര്‍ ഖാലിദ് അടക്കമുള്ളവരെന്നാരോപിച്ച് യു.എ.പി.എ ചുമത്തിയാണ് ഇവരെ ജയിലിലടച്ചത്.