തിരുവനന്തപുരം: തൃശൂര്‍ പൂരം അലങ്കോലമായതില്‍ ജുഡീഷ്യല്‍ അന്വേഷണം പ്രഖ്യാപിക്കണമെന്നാവശ്യപ്പെട്ട് പ്രതിപക്ഷം നല്‍കിയ അടിയന്തരപ്രമേയം നിയമസഭ ചര്‍ച്ച ചെയ്യും. തുടര്‍ച്ചയായ മൂന്നാം ദിവസമാണ് സര്‍ക്കാര്‍ അടിയന്തര പ്രമേയം ചര്‍ച്ച ചെയ്യാന്‍ അനുമതി നല്‍കുന്നത്. ഉച്ചക്ക് 12 മണി മുതലാണ് ചര്‍ച്ച തുടങ്ങിയത്. 

അതേസമയം മുഖ്യമന്ത്രി ഇന്നും സഭയിലെത്തിയില്ല. ആരോഗ്യ പ്രശ്‌നങ്ങള്‍ മൂലമാണെന്നാണ് വിശദീകരണം. മുഖ്യമന്ത്രിക്ക് വേണ്ടി മന്ത്രി എം. ബി രാജേഷ് ആണ് മറുപടി പറയുക. തെറ്റായ കാര്യങ്ങളെ സഭയില്‍ ഉയര്‍ത്തിക്കൊണ്ടു വന്ന് പ്രതിപക്ഷം സഭയെ ദുരുപയോഗം ചെയ്യുകയാണെന്ന് രാജേഷ് പറഞ്ഞു.

പൂരം കലക്കലുമായി ബന്ധപ്പെട്ട അന്വേഷണം പ്രഹസനമെന്ന് പ്രതിപക്ഷം ആരോപിച്ചു. ജുഡീഷ്യല്‍ അന്വേഷണം പ്രഖ്യാപിക്കേണ്ടത് സംബന്ധിച്ച് സഭ നിര്‍ത്തിവെച്ച് ചര്‍ച്ച ചെയ്യണമെന്നായിരുന്നു പ്രതിപക്ഷത്തിന്റെ ആവശ്യം. പൂരം കലക്കലിലെ ത്രിതല അന്വേഷണ റിപ്പോര്‍ട്ട് വരട്ടെ എന്ന നിലപാടാണ് സര്‍ക്കാര്‍ ഇന്നലെ സ്വീകരിച്ചത്.