ദുബൈ: മികച്ച ആപ് കണ്ടെത്താൻ ആപ് ഒളിംപിക്സ് പ്രഖ്യാപിച്ച് യു.എ.ഇ ഉപ പ്രധാന മന്ത്രിയും പ്രതിരോധ മന്ത്രിയും ദുബൈ - കിരീടാവകാശിയും ദുബൈ എക്സിക്യൂട്ടിവ്കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. ലോകത്തെവിടെ നിന്നും ഏത് പ്രായത്തിലുള്ളവർക്കും വ്യക്തി ഗതമായോ ടീമുകളായോ മത്സരത്തിൽ പങ്കെടുക്കാം.

യൂത്ത് ആപ്, ഏറ്റവും ഫലപ്രദമായ ആപ്, ഏറ്റവും നൂതനമായ ആപ്, മികച്ച മൊബൈൽ ഗെയിമിങ് ആപ് എന്നിങ്ങനെ നാല് വിഭാഗങ്ങളിലാണ് മത്സരം. രജിസ്ട്രേഷന് ഇന്നലെ തുടക്കമായി. പങ്കെടുക്കാൻ താൽപര്യമുള്ളവർ അടുത്ത മാസം 13ന് മുൻപായി പേരുകൾ രജിസ്റ്റർ ചെയ്യണം. ജേതാക്കൾക്ക് 550,000 ദിർഹമിൻ്റെ സമ്മാനങ്ങൾ ലഭിക്കും. 6 മാസത്തെ പരിശീലനവും നൽകും.

ആയിരം ഇമറാത്തികൾക്ക് കോഡിങ്, ആപ് വികസിപ്പിക്കൽ, ബിസിനസ് മാതൃക സൃഷ്ടിക്കൽ എന്നിവക്ക് ഇമാറാത്തി ട്രെയ്‌നിങ് അക്കാദമി വഴി പരിശീലനം നൽകും. അടുത്ത വർഷത്തോടെ ആപ് ഡെവലപ്പർമാരുടെ എണ്ണം മൂന്നിരട്ടിയാക്കുക എന്നതാണ് ലക്ഷ്യമെന്നും ഈ മേഖലയിലെ 100 ദേശീയ പദ്ധതികളെ പിന്തുണക്കുമെന്നും ശൈഖ് ഹംദാൻ പറഞ്ഞു. 'ഒളിം പ്യൻ മൈൻഡ് സെറ്റ്' എന്ന ഓൺ ലൈൻ പരിശീലന പരിപാടിയിലൂടെ ആപ്പിന്റെ ആദിമ രൂപം ഉണ്ടാക്കാൻ മത്സരാർഥികളെ സഹായിക്കുകയും ചെയ്യും.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക