വാഷിങ്ടണ്‍: മുംബൈ ഭീകരാക്രമണത്തില്‍ വിചാരണ നേരിടുന്ന പാകിസ്താന്‍ വംശജനായ കനേഡിയന്‍ വ്യവസായി തഹാവുര്‍ റാണയെ ഇന്ത്യക്ക് കൈമാറുമെന്ന് റിപ്പോര്‍ട്ട്. ഡിസംബര്‍ രണ്ടാം പകുതിയോടെ കൈമാറുമെന്നാണ് സൂചന. റാണയുടെ ഹരജി യു.എസ് കോടതി നിരസിച്ചതിനെ തുടര്‍ന്നാണ് കൈമാറ്റ നീക്കം. ഇതുസംബന്ധിച്ച് ഇന്ത്യയു.എസ് അന്വേഷണ ഏജന്‍സികള്‍ ഉദ്യോഗസ്ഥരുമായി ചര്‍ച്ച നടത്തിയിരുന്നു.

കേന്ദ്ര അന്വേഷണ ഏജന്‍സികളില്‍ നിന്നും ഇരു രാജ്യങ്ങളിലെയും നിയമ വകുപ്പുകളില്‍ നിന്നുമുള്ള ഉദ്യോഗസ്ഥര്‍ അടുത്തിടെ ഡല്‍ഹിയിലെ യു.എസ് എംബസിയില്‍ കൂടിക്കാഴ്ച നടത്തിയിരുന്നു. ഏകദേശം മൂന്ന് മണിക്കൂര്‍ നീണ്ട യോഗത്തില്‍ റാണയെ കൈമാറുന്നതായിരുന്നു പ്രധാന ചര്‍ച്ചാവിഷയം. കൈമാറ്റം സുഗമമാക്കുന്നതിനുള്ള ക്രമീകരണങ്ങള്‍ നടത്തുമെന്നും ഇന്ത്യയു.എസ് അന്വേഷണ ഏജന്‍സികള്‍ വ്യക്തമാക്കി. റാണക്ക് മേല്‍ ആരോപിക്കപ്പെട്ട കുറ്റം അമേരിക്കയും ഇന്ത്യയും തമ്മിലുള്ള കൈമാറ്റ ഉടമ്പടിയുടെ നിബന്ധനങ്ങള്‍ക്കുള്ളില്‍ വരുന്നതാണ്. 

കൈമാറല്‍ വിധിക്കെതിരെ സുപ്രിംകോടതിയില്‍ അപ്പീല്‍ നല്‍കാന്‍ റാണക്ക് 45 ദിവസത്തെ സമയമുണ്ട്.