കോഴിക്കോട്: പാലക്കാട് സ്ഥാനാര്‍ഥിതിത്വവുമായി ബന്ധപ്പെട്ട വിഷയത്തില്‍ ഡിസിസി പ്രസിഡന്റിന്റെ കത്ത് പുറത്തുവന്നതില്‍ പ്രതികരിച്ച് കെ.മുരളീധരന്‍. കത്തിന്റെ പേരില്‍ ഇപ്പോള്‍ ചര്‍ച്ച ആവശ്യമില്ലെന്നും ഹൈക്കമാന്‍ഡിന്റെ തീരുമാനം അന്തിമമെന്നും കെ മുരളീധരന്‍ പറഞ്ഞു.

അതേസമയം ഡിസിസി ഈ കാര്യം മുമ്പ് സൂചിപ്പിച്ചിരുന്നവെന്നും തൃശ്ശൂരിലെ തെരഞ്ഞെടുപ്പ് കഴിഞ്ഞപ്പോഴേ താന്‍ ഇനി മത്സരിക്കുന്നില്ലെന്ന് പറഞ്ഞതാണെന്നും അദ്ദേഹം വ്യക്തമാക്കി. സംസ്ഥാന കമ്മിറ്റി നിര്‍ദ്ദേശിച്ച പേര് രാഹുല്‍ മാങ്കൂട്ടത്തിലിന്റേതാണെന്നും അദ്ദേഹം കൂട്ടിച്ചേര്‍ത്തു. 

എങ്ങനെ കത്ത് പുറത്തുവന്നു എന്ന് തനിക്കറിയില്ലെന്നും മുരളീധരന്‍ വ്യക്തമാക്കി. ഈ കത്ത് ഡിസിസി നേരത്തെ തനിക്കയച്ചുതന്നിരുന്നു. സ്ഥാനാര്‍ഥിയെ പ്രഖ്യാപിച്ചപ്പോള്‍ കത്ത് ഫോണില്‍നിന്ന് ഡിലീറ്റാക്കി. തന്റെ ഭാഗത്തുനിന്ന് അത് പുറത്തുപോവാതിരിക്കാനാണ് അങ്ങനെ ചെയ്തത്. പാര്‍ട്ടി പ്രവര്‍ത്തകരെ നിരാശപ്പെടുത്തുന്ന ഒരു തീരുമാനവും തന്റെ ഭാഗത്തുനിന്ന് ഉണ്ടാകില്ല. അനാവശ്യ ചര്‍ച്ചയാണ് ഇപ്പോള്‍ നടക്കുന്നത്. അത്തരം ചര്‍ച്ചകള്‍ നിര്‍ത്തി പാര്‍ട്ടി സ്ഥാനാര്‍ഥിയെ വിജയിപ്പിക്കാന്‍ ശ്രമിക്കണമെന്നും മുരളീധരന്‍ പറഞ്ഞു.