കണ്ണൂര്‍: എ.ഡി.എം നവീന്‍ ബാബുവന്റെ മരണവുമായി ബന്ധപ്പെട്ട പൊലിസ് അന്വേഷണം ശരിയായ ദിശയില്‍ അല്ലെന്ന് പി.പി ദിവ്യ. പ്രശാന്തന്റെ പരാതിയെ തുടര്‍ന്നാണ് എ.ഡി.എമ്മിനെതിരെ ആരോപണം ഉന്നയിച്ചത്. പൊലിസിന്റെയും ആരോഗ്യ വകുപ്പിന്റെ അന്വേഷണ സംഘത്തിന്റേയും മുന്നില്‍ പ്രശാന്തന്‍ ആരോപണം ആവര്‍ത്തിച്ചിട്ടുമുണ്ട് . എന്നാല്‍ ഈ മൊഴി പൊലിസ് കോടതിയില്‍ ഹാജരാക്കിയില്ലെന്നും ദിവ്യ ചൂണ്ടിക്കാട്ടി. 

പ്രസ്തുത മൊഴി ഹാജരാക്കിയാല്‍ പ്രശാന്തന്‍ പണം നല്‍കി എന്ന ആരോപണം സാധൂകരിക്കപ്പെട്ടേനെയെന്നും ദിവ്യ പറയുന്നു.  കോടതിയില്‍ സമര്‍പ്പിക്കുന്ന ജാമ്യ ഹരജിയിലാണ് പൊലിസിനെതിരായ ദിവ്യയുടെ ആരോപണം. ഹരജി ഇന്ന് തലശ്ശേരി പ്രിന്‍സിപ്പല്‍ സെഷന്‍സ് കോടതിയില്‍ സമര്‍പ്പിക്കും.

കഴിഞ്ഞ ദിവസമാണ് ദിവ്യയെ പൊലിസ് കസ്റ്റഡിയില്‍ എടുത്തത്. തലശ്ശേരി പ്രിന്‍സിപ്പല്‍ സെഷന്‍സ് കോടതി മുന്‍കൂര്‍ ജാമ്യ ഹരജി തള്ളിയതിന് പിന്നാലെ ദിവ്യ അന്വേഷണ സംഘത്തിന് മുന്നില്‍ കീഴടങ്ങുകയായിരുന്നു. നവീന്‍ ബാബുവിന്റെ ആത്മഹത്യയിലേക്ക് നയിച്ചത് വ്യക്തിഹത്യയെന്ന പ്രോസിക്യൂഷന്റെയും കുടുംബത്തിന്റെയും വാദം അംഗീകരിച്ചാണ് കോടതി ദിവ്യക്ക് മുന്‍കൂര്‍ ജാമ്യം നിഷേധിച്ചത്.

14 ദിവസത്തേക്ക് റിമാന്‍ഡ് ചെയ്യപ്പെട്ട ദിവ്യ പള്ളിക്കുന്നിലെ വനിതാ ജയിലിലാണ്. ദിവ്യയുടെ ജാമ്യ ഹരജി ഇന്ന് തലശ്ശേരി സെഷന്‍സ് കോടതിയില്‍ സമര്‍പ്പിക്കും. ജാമ്യാപേക്ഷയെ നവീന്‍ ബാബുവിന്റെ കുടുംബം എതിര്‍ക്കും. ഹരജിയില്‍ നവീന്‍ ബാബുവിന്റെ ഭാര്യ മഞ്ജുഷ കക്ഷി ചേരും. നേരത്തെ മുന്‍കൂര്‍ ജാമ്യാപേക്ഷയിലും മഞ്ജുഷ കക്ഷി ചേര്‍ന്നിരുന്നു. മരണം അന്വേഷിക്കുന്ന പ്രത്യേക അന്വേഷണ സംഘം ഇന്ന് യോഗം ചേരും.