ലഖ്നൗ:  ഉത്തര്‍ പ്രദേശില്‍ ഭൂമി തര്‍ക്കത്തിനിടെ കൗമാരക്കാരനെ തലയറുത്തുകൊന്നു. ഉത്തര്‍പ്രദേശിലെ ജൗന്‍പുരിലാണ് ഈ ക്രൂരസംഭവം. ഭൂമിതര്‍ക്കത്തിനിടെ എതിര്‍ വിഭാഗത്തില്‍പ്പെട്ട ഒരാള്‍ വാളുകൊണ്ട് പതിനേഴുകാരന്റെ തല വെട്ടുകയായിരുന്നു. ഉത്തര്‍ പ്രദേശിലെ ജോന്‍പൂരിലാണ് സംഭവം നടന്നത്.

രാംജീത് യാദവിന്റെ മകന്‍ അനുരാഗാണ് കൊല്ലപ്പെട്ടത്. 45 വര്‍ഷമായി ഇരുവിഭാഗങ്ങളും തമ്മില്‍ ഭൂമിതര്‍ക്കം നിലനിന്നിരുന്നെന്ന് എസ്പി അജയ് പാല്‍ ശര്‍മ പറഞ്ഞു. അനുരാഗിന്റെ ശിരസ്സ് മണിക്കൂറുകളോളം മടിയില്‍ വെച്ച് വിലപിച്ച അനുരാഗിന്റെ അമ്മയുടെ വേദനാജനകമായ ചിത്രം ദേശീയ മാധ്യമങ്ങള്‍ പുറത്തുവിട്ടിരുന്നു.

സംഭവത്തില്‍ നാലു പേരെ അറസ്റ്റു ചെയ്തിട്ടുണ്ട്. അനുരാഗിനെ വെട്ടിയ ലാല്‍ത യാദവ് എന്നയാളാണ് അറസ്റ്റിലായവരില്‍ ഒരാള്‍. ഇയാളുടെ മകന്‍ രമേശിനായി തിരച്ചില്‍ തുടരുകയാണ്.

അസംഗഡ് ജില്ലയിലെ കബിറുദ്ദീന്‍ ഗ്രാമത്തില്‍ രാംജീത് യാദവും ലാല്‍ത യാദവും തമ്മിലുള്ള ഭൂമി തര്‍ക്കമാണ് കൊലപാതകത്തില്‍ കലാശിച്ചതെന്ന് പൊലീസ് സൂപ്രണ്ട് അജയ്പാല്‍ ശര്‍മ പറഞ്ഞു. സംഭവത്തിന് പിന്നില്‍ പ്രവര്‍ത്തിച്ചവര്‍ക്ക് കടുത്ത ശിക്ഷ നല്‍കുമെന്ന് ജൗന്‍പൂര്‍ ജില്ലാ മജിസ്‌ട്രേറ്റ് ദിനേശ് ചന്ദ്ര വ്യക്തമാക്കി.