പാരിസ്: ഒരു ബാനര്‍. ഫലസ്തീന്‍ പോരാട്ടത്തിന്റേയും ഖുദ്‌സിന്റേയും പിഞ്ചോമനകളുടെ ചോരപ്പാടിന്റേയും ജ്വലിക്കുന്ന നോവുകള്‍ ഉണര്‍ത്തുന്ന ഒരു ബാനര്‍. ഗാലറിയുടെ ഒരു വശം മുഴുവന്‍ മൂടി ആ ബാനര്‍ ഉയര്‍ന്നു നിന്ന ആ ബാനര്‍ ലോകത്തിന്റെ മുഴുവന്‍ കണ്ണുകളേയും തങ്ങളിലേക്കെത്തിക്കാന്‍ മാത്രം ശക്തമായിരുന്നു. 

ചാമ്പ്യന്‍സ് ലീഗ് മത്സരത്തിനിടെയാണ് 'ഫ്രീ ഫലസ്തീന്‍' എന്ന ആ ബാനര്‍ ഉയര്‍ന്നത്.  പി.എസ്.ജി ആരാധകരാണ് ബാനര്‍ ഉയര്‍ത്തി തങ്ങളുടെ നിലപാട് അറിയിച്ചത്. ബുധനാഴ്ച അത്‌ലറ്റികോ മാഡ്രിഡിനെതിരായി നടന്ന മത്സരത്തിനിടെയായിരുന്നു സംഭവം. മത്സരം തുടങ്ങുന്നതിന് തൊട്ടുമുന്‍പായിരുന്നു ഗാലറിയില്‍ ബാനര്‍ ഉയര്‍ന്നത്.

അല്‍ അഖ്‌സ പള്ളിയുടെയും ഫലസ്തീന്‍, ലബനീസ് പതാകകളുടെ ചിത്രങ്ങളും ബാനറില്‍ ഉണ്ടായിരുന്നു. 'മൈതാനത്ത് യുദ്ധം,ലോകത്ത് സമാധാനം 'എന്നിങ്ങനെ എഴുതിയിരുന്നു ബാനറില്‍. ഫ്രീ ഫലസ്തീനിലെ 'i' എന്ന അക്ഷരം, ഫലസ്തീന്‍ ഐക്യദാര്‍ഢ്യത്തിന്റെ പ്രതീകമായ കഫിയയയുടെ മാതൃകയില്‍ അധിനിവേശ ഫലസ്തീന്‍ പ്രദേശങ്ങളുടെ ഭൂപടം ചിത്രീകരിച്ചിരിക്കുന്നു.

ഫലസ്തീന്‍ വിഷയത്തില്‍ തിങ്കളാഴ്ച ഫ്രഞ്ച് ഫുട്ബാള്‍ അസോസിയേഷന്റെ ഓഫിസിലേക്ക് പ്രതിഷേധവും സംഘടിപ്പിച്ചിരുന്നു. പാരീസിലെ ഫുട്ബാള്‍ അസോസിയേഷന്‍ ആസ്ഥാനത്തേക്കാണ് ഫലസ്തീന്‍ അനുകൂല പ്രതിഷേധക്കാര്‍ എത്തിയത്. യുവേഫ ചാമ്പ്യന്‍സ് ലീഗിലെ ഫ്രഞ്ച് ഇസ്‌റാഈല്‍ ടീമുകള്‍ തമ്മിലുള്ള മത്സരം മാറ്റിവയ്ക്കണമെന്നായിരുന്നു പ്രതിഷേധക്കാരുടെ ആവശ്യം.