പത്തനംതിട്ട: പാലക്കാട് ഉപതെരഞ്ഞെടുപ്പിലെ യു.ഡി.എഫ് സ്ഥാനാര്‍ഥി രാഹുല്‍ മാങ്കൂട്ടത്തിലിന്റെ പ്രചാരണ വീഡിയോ പത്തനംതിട്ട സി.പി.എമ്മിന്റെ  ഫേസ്ബുക്ക് പേജില്‍. പാലക്കാട് എന്ന സ്‌നേഹവിസ്മയം എന്ന അടിക്കുറിപ്പോടെയാണ് വീഡിയോ ഫേസ്ബുക്ക് പേജില്‍ പ്രത്യക്ഷപ്പെട്ടത്. 

അബദ്ധം മനസിലായതോടെ പേജില്‍ നിന്ന് ദൃശ്യങ്ങള്‍ രാത്രി തന്നെ ഒഴിവാക്കി. അതേസമയം പേജ് വ്യാജമാണെന്ന് സിപിഎം ജില്ലാ സെക്രട്ടറി കെ.പി.ഉദയഭാനു ആദ്യം വിശദീകരിച്ചു. എന്നാല്‍ വീഡിയോ വന്നത് ഔദ്യോഗിക എഫ്ബി പേജില്‍ തന്നെയാണെന്ന് പിന്നീട് ജില്ലാ സെക്രട്ടറി തിരുത്തി. അക്കൗണ്ട് ഹാക്ക് ചെയ്താണ് വീഡിയോ പോസ്റ്റ് ചെയ്തതെന്നാണ് പുതിയ വിശദീകരണം. എസ്പിക്ക് പരാതി നല്‍കുമെന്നും ഉദയഭാനു വിശദീകരിച്ചു.  

63000 ത്തോളം ഫോളോവേഴ്‌സുള്ള പേജ് 2013 മാര്‍ച്ച് 29 നാണ് ആരംഭിച്ചത്. വര്‍ഷങ്ങളായി സി.പി.എമ്മുമായി ബന്ധപ്പെട്ട വാര്‍ത്തകള്‍ മാത്രമാണ് പേജില്‍ പങ്കുവെക്കപ്പെട്ടിരുന്നത്.