നെയ്യാറ്റിന്‍കര: പത്താംകല്ല് ബിഷപ്പ്ഹൗസിനു മുന്നില്‍ നെയ്യാറ്റിന്‍കര സെയില്‍സ്ടാക്‌സ് അധികൃതരും നാട്ടുകാരും തമ്മില്‍ സംഘര്‍ഷം.
ഇന്നലെ രാവിലെ 10.30 ഓടെയായിരുന്നു സംഭവം. ആലപ്പുഴയില്‍ നിന്നും സ്റ്റീല്‍ കയറ്റിവന്ന ബാബ ട്രാന്‍സ് പോര്‍ട്ട് എന്ന ലോറിയുടെ ഡ്രൈവര്‍ വിതുര ജയനെ നെയ്യാറ്റിന്‍കര സെയില്‍ ടാക്‌സ് അസി.കമ്മിഷണര്‍ ശൈലേന്ദ്രന്‍ മര്‍ദിച്ചതാണ് സംഘര്‍ഷത്തിന് കാരണമായത്. ലോറിയില്‍ കൊണ്ടു വന്ന ചരക്കിന് ആവശ്യമായ രേഖകള്‍ ഉണ്ടെന്നാണ് ലോറി ജീവനക്കാര്‍ പറയുന്നത്. എന്നാല്‍ രേഖകളില്‍ തിരിമറിയുണ്ടെന്ന് അസി.കമ്മിഷണര്‍ ശെലേന്ദ്രന്‍ പറഞ്ഞു. പ്രശ്‌നം രൂക്ഷമാകുന്നതിനിടെ അതുവഴി വന്ന പാറശാല എം.എല്‍.എ സി.കെ.ഹരീന്ദ്രന്‍ ഇടപെട്ട് രംഗം ശാന്തമാക്കി.
നെയ്യാറ്റിന്‍കര ഡിവൈ.എസ്.പി സുല്‍ഫിക്കറിന്റെയും സി.ഐ. സന്തോഷ്‌കുമാറിന്റെയും നേതൃത്വത്തില്‍ ഇരു വിഭാഗങ്ങളുമായി ചര്‍ച്ചയും നടത്തി.