കല്‍പ്പറ്റ: വയനാട് കമ്പളക്കാട്ട് ബി.ജെ.പി തെരഞ്ഞെടുപ്പ് പ്രചരണ യോഗത്തില്‍ സുരേഷ് ഗോപിയും ബി.ജെ.പി സംസ്ഥാന ഉപാധ്യക്ഷന്‍ ബി. ഗോപാലകൃഷ്ണനും നടത്തിയ വിദ്വേഷ പരാമര്‍ശത്തില്‍ അന്വേഷണം അവസാനിപ്പിച്ച് പൊലീസ്. കോണ്‍ഗ്രസ് നേതാവ് വി.ആര്‍.അനൂപാണ് പരാതി നല്‍കിയിരുന്നത്. പരാതിക്കാരന്റെ മൊഴി പോലും എടുക്കാതെയാണ് അന്വേഷണം അവസാനിപ്പിച്ചത്. 

കലാപാഹ്വാനത്തിന് കേസെടുക്കണമെന്നായിരുന്നു പരാതി. ഇനി കോടതിയെ സമീപിക്കാനാണ് തീരുമാനമെന്ന് അനൂപ് പറഞ്ഞു. കേന്ദ്രമന്ത്രി പദവി ദുരുപയോഗം ചെയ്തുകൊണ്ട് മുനമ്പം വിഷയത്തില്‍ വഖഫ് ബോര്‍ഡിനെക്കുറിച്ച് തെറ്റിദ്ധാരണ പരത്തിയെന്നായിരുന്നു സുരേഷ് ഗോപിക്കെതിരായ പരാതി. വാവര് സ്വാമിയെ അധിക്ഷേപിച്ചെന്നായിരുന്നു ബി. ഗോപാലകൃഷ്ണനെതിരായ പരാതി.

പതിനെട്ട് പടിയുടെ മുകളില്‍ അയ്യപ്പന്‍ ഇരിക്കുന്നു. പടിക്കു താഴെ വേറൊരു ചങ്ങായി ഇരിപ്പുണ്ട്, വാവര്. ഈ വാവര് ഞാനിത് വഖഫിന് കൊടുത്തു എന്ന് പറഞ്ഞാല്‍ നാളെ ശബരിമല വഖഫിന്റേതാകും. അയ്യപ്പന് ഇറങ്ങിപ്പോകേണ്ടി വരും.. -എന്ന് പറഞ്ഞാണ് ബി.ജെ.പി നേതാവ് ബി. ഗോപാലകൃഷ്ണന്‍ വാവര് സ്വാമിയെ അധിക്ഷേപിച്ചത്.