പാലക്കാട്: കേരള ക്രിക്കറ്റ് അസോസിയേഷൻ്റെ (കെ.സി.എ) അന്തർദേശീയ നിലവാരമുള്ള ഇന്ത്യയിലെ ആദ്യ സ്പോർട്സ് ഹബ്ബ് പാലക്കാട്ട് വരുന്നു. മലമ്പുഴ അകത്തേത്തറ ചാത്തൻകുളങ്ങര ദേവീ ക്ഷേത്രം ട്രസ്റ്റിന് കീഴിലുള്ള 21 ഏക്കർ സ്ഥലം ലീസിനെടുത്താണ് കെ.സി.എ സ്പോർട്സ് ഹബ്ബ് സ്ഥാപിക്കുന്നത്.

33 വർഷത്തേക്ക് സ്ഥലം നൽകുന്നത് സംബന്ധിച്ച എം.ഒ.യു ഒപ്പിട്ടതായും കരാർ രജിസ്ട്രേഷൻ ഉടനെ പ്രാബല്യത്തിൽ വരുമെന്നും മലബാർ ദേവസ്വം പ്രസിഡൻ്റ് എം.ആർ മുരളി പറഞ്ഞു. കരാറിൻ്റെ ഭാഗമായി പ്രതിവർഷം 21,35,000 രൂപ ക്ഷേത്ര ട്രസ്റ്റിന് കേരള ക്രിക്കറ്റ് അസോസിയേഷൻ നൽകുമെന്നും അദ്ദേഹം പറഞ്ഞു.

40 കോടി രൂപയാണ് ബജറ്റ്. ഇന്ത്യയിൽ തന്നെ ആദ്യമാണ് എല്ലാവിധ സ്പോർട്സ് ഇനങ്ങൾക്കുമായി ക്രിക്കറ്റ് അസോസിയേഷൻ സംവിധാനമൊരുക്കുന്നതെന്ന് കെ.സി.എ പ്രസിഡൻ്റ് ജയേഷ് ജോർജ് പറയുന്നു. ഫസ്റ്റ് ക്ലാസ് ക്രിക്കറ്റ് ടൂർണമെൻ്റുകളും 'എ' ടീമുകളെ പങ്കെടുപ്പിച്ചുള്ള അന്തർദേശീയ മത്സരങ്ങളും നടത്താനാകുന്ന ക്രിക്കറ്റ് സ്റ്റേഡിയം, രഞ്ജി മത്സരങ്ങളുൾപ്പടെ നടത്താനാകുന്ന മറ്റൊരു ക്രിക്കറ്റ് മൈതാനം, പരിശീലനത്തിന് ആവശ്യമായ ഇൻഡോർ സ്റ്റേഡിയം, ഫുട്ബോൾ മൈതാനം, ബാസ്ക്കറ്റ് ബോൾ, ബാഡ്മിൻ്റൺ- ടെന്നീസ് കോർട്ടുകൾ, അത് ലറ്റിക് പരിശീലന കേന്ദ്രം, സ്കേറ്റിങ് ട്രാക്ക്, സ്വിമ്മിങ് പൂൾ എന്നിവയാണ് സ്പോർട്സ് ഹബ്ബിൽ ഒരുക്കുന്നത്.

പാലക്കാട് - കോഴിക്കോട് ഗ്രീൻ ഫീൽഡ് ഹൈവേക്ക് സമീപമായാണ് അകത്തേത്തറയിലെ സ്പോർട്സ് ഹബ്ബ് വരിക. പദ്ധതി പൂർണമാകുന്നതോടെ നൂറോളം തദ്ദേശീയർക്ക് സ്ഥിരം തൊഴിൽ ലഭിക്കാനും സഹായകമാകും. 2025 ഓഗസ്റ്റോടെ ആദ്യഘട്ടമായി ക്രിക്കറ്റ്, ഫുട്ബോൾ മൈതാനങ്ങൾ പൂർത്തിയാകും. 2027ഓടെ പദ്ധതി പൂർണമായും യാഥാർഥ്യമാകുമെന്നും ഭാരവാഹികൾ പറഞ്ഞു.