മസ്‌കത്ത്: 1,000 ജീവനക്കാരെ പിരിച്ചുവിട്ടതുമായി ബന്ധപ്പെട്ട് വിവിധ സോഷ്യല്‍ മീഡിയ പ്ലാറ്റ്‌ഫോമുകളില്‍ പ്രചരിക്കുന്ന റിപ്പോര്‍ട്ടുകള്‍ തള്ളി ഒമാന്‍ എയര്‍ലൈന്‍ കമ്പനിയായ ഒമാന്‍ എയര്‍. പ്രവര്‍ത്തനക്ഷമത മെച്ചപ്പെടുത്തുകയും ഭാവി സുസ്ഥിരതയ്ക്കായി പ്രവര്‍ത്തിക്കുകയും ചെയ്തുകൊണ്ട് കമ്പനിയെ സാമ്പത്തിക സ്ഥിരതയിലേക്ക് തിരിച്ചുവിടുന്നതിനായി ഒമാന്‍ എയര്‍ സമഗ്രമായ ഒരു പരിവര്‍ത്തന പരിപാടി നടപ്പിലാക്കുകയാണെന്ന് എയര്‍ലൈനില്‍ നിന്നുള്ള പ്രസ്താവനയില്‍ പറയുന്നു.

വ്യോമയാന മേഖലയിലെ വ്യവസായ മാനദണ്ഡങ്ങളുമായി പൊരുത്തപ്പെടുന്നതും കമ്പനിയുടെ ഭാവി ആവശ്യങ്ങള്‍ നിറവേറ്റുന്നതുമായ കൂടുതല്‍ ഫലപ്രദമായ സംഘടനാ ഘടന വികസിപ്പിച്ചതായി കമ്പനി അവകാശപ്പെട്ടു.

പുനര്‍നിര്‍മ്മാണ വേളയില്‍ ലഭ്യമായ റോളുകളില്‍ ഒമാനികള്‍ക്ക് മുന്‍ഗണന നല്‍കി. അതിന്റെ ഫലമായി 426 പ്രവാസി ജീവനക്കാരെ പിരിച്ചുവിടാന്‍ തീരുമാനിച്ചു. പരിവര്‍ത്തനം ആരംഭിച്ചതിന് ശേഷം സ്വദേശിവല്‍ക്കരണ നിരക്ക് മെച്ചപ്പെട്ടു, 74% ല്‍ നിന്ന് 78% ആയി വര്‍ദ്ധിച്ചു. മിക്ക വകുപ്പുകളും 90% സ്വദേശിവല്‍ക്കരണം കൈവരിച്ചിട്ടുണ്ട്. വ്യോമയാന മേഖലയ്ക്ക് അന്താരാഷ്ട്ര വൈദഗ്ധ്യത്തെ ആശ്രയിക്കേണ്ടതുണ്ടെങ്കിലും മറ്റ് വകുപ്പുകളിലും ഒമാനൈസേഷന്‍ വര്‍ദ്ധിപ്പിക്കാന്‍ കമ്പനി ശ്രമിക്കുകയാണ്.