ചെന്നൈ: തമിഴ്‌നാട് മുന്‍ അധ്യക്ഷനും മുതിര്‍ന്ന കോണ്‍ഗ്രസ് നേതാവുമായ ഇ.വി.കെ.എസ് ഇളങ്കോവന്‍ അന്തരിച്ചു. 76 വയസായിരുന്നു. ഈറോഡ് ഈസ്റ്റ് എം.എല്‍.എയാണ്. ശ്വാസകോശ സംബന്ധമായ അസുഖത്തെത്തുടര്‍ന്ന് ചികിത്സയിലായിരുന്നു. 

ഇക്കഴിഞ്ഞ നവംബര്‍ 11നാണ് ഇളങ്കോവനെ കടുത്ത പനിയും ശ്വാസ തടസവും അനുഭവപ്പെട്ടതിനെത്തുടര്‍ന്ന് മണപ്പാക്കത്തെ ആശുപത്രിയില്‍ പ്രവേശിപ്പിച്ചത്.

മകന്‍ തിരുമഗന്‍ എവേരയുടെ മരണത്തെത്തുടര്‍ന്ന് 2023ലെ ഉപതെരഞ്ഞെടുപ്പില്‍ ഇളങ്കോവന്‍ മത്സരിക്കുകയും 66,575 വോട്ടുകളുടെ ഭൂരിപക്ഷത്തില്‍ വിജയിക്കുകയും ചെയ്തിരുന്നു. ദ്രാവിഡ മുന്നേറ്റത്തിന് ചുക്കാന്‍ പിടിച്ച സാമൂഹിക പരിഷ്‌കര്‍ത്താവ് പെരിയാര്‍ ഇ.വി രാമസ്വാമിയുടെ സഹോദരന്‍ കൃഷ്ണസ്വാമിയുടെ ചെറുമകനാണ്.