മണ്ണാര്‍ക്കാട്: തെയ്യോട്ടുചിറ  കമ്മുസൂഫി ണ്ടആണ്ട് നേര്‍ച്ചക്ക് നാളെ രാവിലെ തുടക്കമാകും. രാവിലെ 9ന് ഉണ്ണിക്കോയ തങ്ങള്‍ കുരവമ്പലം പതായ ഉയര്‍ത്തുന്നതോടെ ആറ് ദിവസം നീണ്ടണ്ടു നില്‍കുന്ന ഉറൂസിന് തുടക്കമാകും.
ശനി രാവിലെ ആറിന് മഹല്ല് ഖാസി സി. കെ മൊയ്തുട്ടി മുസ്ല്യാര്‍ ഖുര്‍ആന്‍ പാരായണത്തിന് നേതൃത്വം നല്‍കും. തുടര്‍ന്ന് നടക്കുന്ന പഠന ക്യാംപില്‍ സൈബര്‍ ലോകം നടപ്പാതയിലെ ചതിക്കുഴികള്‍ എന്ന വിഷയത്തില്‍ ഹംസ അഞ്ചുമുക്കില്‍ ക്ലാസെടുക്കും. തുടര്‍ന്ന് ഇസ്സയുടെ നേതൃത്വത്തില്‍ ക്വിസ് മല്‍സരം നടക്കും. വൈകീട്ട് ഏഴിന് നടക്കുന്ന കല്ലൂര്‍ ഉസ്താദ് അനുസ്മരണ സമ്മേളനത്തില്‍ അയ്യൂബ് ഫൈസി മുഖ്യ പ്രഭാഷണം നടത്തും. തുടര്‍ന്ന് അല്ലാഹുവിന്റെ ഔലിയാക്കള്‍ എന്ന വിഷയത്തില്‍ നൗഷാദ് ബാഖവി പ്രഭാഷണം നടത്തും.
ഞായറാഴ്ച രാവിലെ നടക്കുന്ന പഠന ക്യാംപില്‍ റഷീദ് മാസ്റ്റര്‍ കൊടിയൂറ വിന്‍ഡോ ഓഫ് ടുമോറോ എന്ന വിഷയത്തില്‍ ക്ലാസെടുക്കും. ഉച്ചക്ക് 2ന് നല്ല കുടുംബം നല്ല സമൂഹം എന്ന വിഷയത്തില്‍ അബ്ദുറഹ്മാന്‍ ഫൈസി ചേളാരി ക്ലാസെടുക്കും. വൈകീട്ട് എട്ടിന് അന്‍വര്‍ മുഹ്‌യദ്ദീന്‍ ഹുദവി ആലുവ ഖുര്‍ആന്‍ കാലത്തിനൊപ്പം എന്ന വിഷയത്തില്‍ മതപ്രഭാഷണം നടത്തും.
തിങ്കളാഴ്ച വൈകീട്ട് എട്ടിന് ഹിഫ്‌ള് ഖുര്‍ആന്‍ സനദ് ദാനവും മതപ്രഭാഷണവും നടക്കും. പാണക്കാട് ഹൈദറലി ശിഹാബ് തങ്ങള്‍ സനദ്ദാനം നടത്തും. സി. എഛ് അബ്ദുറഹ്മാന്‍ വഹബി സനദ്ദാന പ്രഭാഷണം നടത്തും. തുടര്‍ന്ന് ഇബ്രാഹീം ഖലീല്‍ ഹുദവി കാസര്‍ഗോഡ് മടങ്ങുക നാഥനിലേക്ക് എന്ന വിഷയത്തില്‍ മതപ്രഭാഷണം നടത്തും.
ചൊവ്വാഴ്ച ഉച്ചക്ക് 2ന് നടക്കുന്ന കമാലി സംഗമത്തില്‍ ജലീല്‍ സഖാഫി പുല്ലാര ആചാരം എന്ന വിഷയത്തില്‍ ക്ലാസെടുക്കും. വൈകീട്ട് എഴിന് നടക്കുന്ന ദുആ സമ്മേളനത്തിന് ഏലംകുളം ബാപ്പു മുസ്ല്യാര്‍ നേതൃത്വം നല്‍കും. പാണക്കാട് റഷീദലി ശിഹാബ് തങ്ങള്‍ ഉല്‍ഘാടനം ചെയ്യും.
ബുധനാഴ്ച വൈകീട്ട് ഏഴിന് നടത്തുന്ന ഖതം ദുആക്ക് മാത്തൂര്‍ യു. പി മുഹമ്മദ് മുസ്‌ലിയാര്‍ നേതൃത്വം നല്‍കും.
വ്യാഴാഴ്ച രാവിലെ എട്ടിന് നടക്കുന്ന മൗലിദ് പാരായണത്തിന് ഇമ്പിച്ചിക്കോയ തങ്ങള്‍ കൊടക്കാട് നേതൃത്വം നല്‍കും. തുടര്‍ന്ന് അന്നദാനം നടക്കും.