മൈസൂരു: ഇന്‍ഫോസിസിന്റെ മൈസൂരു ക്യാംപസില്‍ പുലിയെ കണ്ടതിനെത്തുടര്‍ന്ന് ജീവനക്കാര്‍ക്കു വര്‍ക്ക് ഫ്രം ഹോം ഏര്‍പ്പെടുത്തി. കഴിഞ്ഞ ദിവസം പുലര്‍ച്ചെയാണ് ഹെബ്ബാള്‍ ഇന്‍ഡസ്ട്രിയല്‍ ഏരിയയിലെ ഇന്‍ഫോസിസ് ക്യാംപസില്‍ പുലിയെ കണ്ടത്.

350 ഏക്കറോളം വരുന്ന കാമ്പസിലെ വിവിധ സി.സി.ടി.വി കാമറകളില്‍നിന്ന് പുലിയുടെ ദൃശ്യം ലഭിച്ചു. ഇതോടെ ക്യാംപസിനുള്ളിലും പുറത്തുമുള്ള ജീവനക്കാര്‍ക്ക് ഐടി വിഭാഗം ജാഗ്രതാനിര്‍ദേശം നല്‍കുകയായിരുന്നു. ക്യാംപസിനുള്ളിലെ ഹോസ്റ്റല്‍ മുറികളില്‍നിന്നു പുറത്തിറങ്ങരുതെന്നും നിര്‍ദേശമുണ്ട്.

സംരക്ഷിത വനത്തിനോടു ചേര്‍ന്നാണ് മൈസൂരിലെ ഇന്‍ ഫോസിസ് ക്യാംപസ്. ഇവിടെ 15,000ല്‍പ്പരം ജീവനക്കാരുണ്ട്. 2011ലും ഇവിടെ പുലിയിറങ്ങി പരിഭ്രാന്തി സൃഷ്ടിച്ചതായി പറയുന്നു.

പുലര്‍ച്ചെ നാലോടെ വനംവകുപ്പിന്റെ 50 അംഗ സംഘം സ്ഥലത്തെത്തി പുലിയെ പിടിക്കാനായി കൂടുകള്‍ സ്ഥാപിച്ചിരിക്കുകയാണ്. ഇതിനുപുറമെ, പുലിയുടെ നീക്കങ്ങള്‍ അറിയാന്‍ ഡ്രോണ്‍ കാമറകള്‍ ഉപയോഗിക്കുന്നുണ്ട്.