മംഗളൂരു: മുതിര്‍ന്ന പണ്ഡിതനും ചിന്തകനും എഴുത്തുകാരനുമായ പ്രൊഫ. മുസാഫര്‍ ഹുസൈന്‍ അസ്സാദി അന്തരിച്ചു. 63 വയസ്സായിരുന്നു. വെള്ളിയാഴ്ച രാത്രി ബംഗളൂരുവിലെ സ്വകാര്യ ആശുപത്രിയിലായിരുന്നു അന്ത്യം. മൈസൂരു സര്‍വകലാശാല ആക്ടിങ് വൈസ് ചാന്‍സലറായിരുന്ന അദ്ദേഹം പൊളിറ്റിക്കല്‍ സയന്‍സ് വിഭാഗം ഡീനുമായിരുന്നു. റായ്ച്ചൂര്‍ സര്‍വകലാശാലയുടെ സ്‌പെഷ്യല്‍ ഓഫീസറായി സേവനമനുഷ്ഠിച്ചിട്ടുണ്ട്. 

ആദിവാസി സമൂഹങ്ങളുടെ ജീവിതത്തെയും ജീവിതരീതിയെയും കുറിച്ച് വിപുലമായ പഠനങ്ങള്‍ നടത്തിയിട്ടുണ്ട്. ഗോത്രവര്‍ഗക്കാരുടെ കുടിയിറക്കം പരിഹരിക്കാന്‍ നിയോഗിച്ച സമിതിയുടെ അധ്യക്ഷനായി അദ്ദേഹം സേവനമനുഷ്ഠിച്ചു. കാര്‍ഷിക പഠനം, ആഗോളവല്‍ക്കരണം, ഗാന്ധിയന്‍ തത്ത്വചിന്ത, രാഷ്ട്രീയ സാമൂഹികശാസ്ത്രം, ജനാധിപത്യ സിദ്ധാന്തങ്ങള്‍, സാമൂഹിക പ്രസ്ഥാനങ്ങള്‍, താരതമ്യ ഭരണം, ഇന്ത്യന്‍ രാഷ്ട്രീയം, മനുഷ്യാവകാശങ്ങള്‍, ആഗോള രാഷ്ട്രീയ സിദ്ധാന്തങ്ങള്‍ തുടങ്ങിയ വിവിധ മേഖലകളില്‍ അദ്ദേഹത്തിന്റെ ഗവേഷണങ്ങളും സംഭാവനകളും വ്യാപിച്ചു കിടക്കുന്നു.

ഉഡുപ്പി ജില്ലയിലെ ഷിര്‍വ സ്വദേശിയായ ഡോ. മുസാഫര്‍ അസ്സാദി മംഗളൂരു സര്‍വകലാശാലയില്‍നിന്ന് ബിരുദാനന്തര ബിരുദവും എംഫിലും പൂര്‍ത്തിയാക്കി.  ജവഹര്‍ലാല്‍ നെഹ്‌റു സര്‍വകലാശാലയില്‍ നിന്ന് (ജെ.എന്‍.യു) പി.എച്ച്.ഡി ചെയ്തു. ചിക്കാഗോ യൂനിവേഴ്‌സിറ്റിയില്‍ റോക്ക്‌ഫെല്ലര്‍ ഫെല്ലോഷിപ്പും പോസ്റ്റ്‌ഡോക്ടറല്‍ പഠനവും നടത്തി.  ട്രൈബല്‍ ഡിസ്‌പ്ലേസ്‌മെന്റ് സംബന്ധിച്ച ഹൈക്കോടതി കമ്മിറ്റിയുടെ അധ്യക്ഷനായിരുന്നു. 

11 പുസ്തകങ്ങള്‍ രചിച്ച അദ്ദേഹത്തിന് കര്‍ണാടക സാഹിത്യ അക്കാദമി അവാര്‍ഡ് ഉള്‍പ്പെടെ നിരവധി ബഹുമതികള്‍ പ്രൊഫ. അസ്സാദിക്ക് ലഭിച്ചു.

Prof. Musaffer Hussain Asadi, a distinguished academic, thinker, and author, passed away at 63 in Bangalore