മുംബൈ: ഇന്ത്യന്‍ ക്രിക്കറ്റിന് പുതിയ മാനങ്ങളിലേക്ക് എത്തിച്ചാണ് മുന്‍കോച്ച്  രാഹുല്‍ ദ്രാവിഡ് ഇന്ത്യന്‍ ക്രിക്കറ്റ് കോച്ച് എന്ന പദവിയില്‍ നിന്ന് പടിയിറങ്ങിയത്. ഇന്ത്യന്‍ ക്രിക്കറ്റ് ടീം കോച്ച് ആവുകയെന്നത് വിരമിച്ച് ജീവിതത്തിന്റെ സായംകാലം ചിലവഴിക്കുന്ന മിക്ക മുന്‍ ക്രിക്കറ്റ് താരങ്ങളുടെയും ആഗ്രഹമാണ്. ടി20 ലോകകപ്പിന്റെ ഫൈനലില്‍ ഓസ്‌ട്രേലിയയെ പരാജയപ്പെടുത്തി ഒരു പതിറ്റാണ്ടു കാലത്തിനു ശേഷം ഇന്ത്യ കിരീടമുയര്‍ത്തിയപ്പോള്‍ അത് ദ്രാവിഡിന്റെ കോച്ചിങ് കരിയറിലെ എക്കാലത്തെയും വലിയ പൊന്‍തൂവലായി മാറി. ക്യാപ്റ്റന്‍ രോഹിത് ശര്‍മ്മക്കും ഈ വിജയത്തില്‍ കാര്യമായ പങ്കുണ്ട്. 

2023 ല്‍ ഇന്ത്യയില്‍ നടന്ന ഏകദിന ലോകകപ്പിന്റെ സെമി ഫൈനലില്‍ വീണുപോയ ഇന്ത്യന്‍ ക്രിക്കറ്റ് ടീമിന്റെയും കോച്ച് രാഹുല്‍ ദ്രാവിഡിന്റെയും നേര്‍ക്കുയര്‍ന്ന വിമര്‍ശന ശരങ്ങളെ ഇല്ലാതാക്കാന്‍ ദ്രാവിഡിനും സംഘത്തിനും ടി20 ക്രിക്കറ്റ് കിരീടം നേടണമായിരുന്നു. എങ്കിലും പൊതുവെ വലിയ പരാജയങ്ങളോ നിരന്തരമായ പരമ്പര തോല്‍വികളോ ഇല്ലാതെ തന്റെ അധ്യായം ഇന്ത്യന്‍ ക്രിക്കറ്റ് ചരിത്രത്തില്‍ ഏറെക്കുറെ സംതൃപ്തിയോയോടെ രേഖപ്പെടുത്താന്‍ രാഹുല്‍ ദ്രാവിഡിന് കഴിഞ്ഞു.
 
രാഹുല്‍ ദ്രാവിഡിന്റെ കാലത്തും ബെംഗളൂരുവിലെ നാഷണല്‍ ക്രിക്കറ്റ് അക്കാഡമിയുടെ തലവനായിരുന്ന വിവിഎസ്  ലക്ഷ്മണിനെ ആയിരുന്നു ഇന്ത്യന്‍ ക്രിക്കറ്റ് ടീം കോച്ച് സ്ഥാനത്തേയ്ക്ക്  ആദ്യം പരിഗണിച്ചിരുന്നതെന്ന വാര്‍ത്തകള്‍ വന്നത് അടുത്തിടെയായിരുന്നു. ദ്രാവിഡ് ടെസ്റ്റ് ടീമുമായി തിരക്കിലായിരുന്നു സമയത്ത് നേരത്തെ ഏകദിന ടീമിനൊപ്പം ദക്ഷിണാഫ്രിക്കയില്‍ ദ്രാവിഡിന് പകരക്കാരനായി ലക്ഷ്മണ്‍ പോയിരുന്നു. 

രാഹുല്‍ ദ്രാവിഡിന് പിന്നാലെ വന്ന ഗൗതം ഗംഭീറിന് കീഴില്‍ ശ്രീലങ്കക്കെതിരായ ഏകദിന പരമ്പര പരാജയം രുചിച്ചപ്പോള്‍ അത് ഇനി ആവര്‍ത്തിക്കില്ലെന്നാണ് മിക്കവാറും കരുതിയത്. പക്ഷെ പിന്നീട് കാര്യങ്ങള്‍ തകിടം മറിയുന്നതാണ് കണ്ടത്. ന്യൂസിലന്റിനെതിരായ ടെസ്റ്റ് പരമ്പര അടിയറ വെച്ചതിനു പിന്നാലെ ഇപ്പോള്‍ ഓസ്‌ട്രേലിയക്കെതിരെ ചരിത്ര തോല്‍വി പിണഞ്ഞിരിക്കുന്നു. പുഷ്‌കലമായ ദ്രാവിഡ കാലത്തിനു ശേഷം ചരിത്രത്തിലെ ഏറ്റവും വലിയ ദുരന്ത ഘട്ടങ്ങളിലൊന്നിലൂടെ ഇന്ത്യന്‍ ടെസ്റ്റ് ക്രിക്കറ്റ് ടീം കടന്നു പോകുമ്പോള്‍ ഏകദിന, ടി20 ക്രിക്കറ്റില്‍ ഇന്ത്യ ഇപ്പോഴും കരുത്തരാണ്. രോഹിത്തും വിരാട് കോഹ്‌ലിയും പ്രതാപ കാലത്തിന്റെ നിഴലുകളായി മാറിയപ്പോള്‍ ടീമിന് ഒന്നാകെ ജസ്പ്രീത് ബുംറയെ ചണ്ടിപോലെ പിഴിഞ്ഞെടുക്കേണ്ടി വന്നു. യഥാര്‍ത്ഥത്തില്‍ തന്ത്രങ്ങളൊന്നുമില്ലാതെ വിക്കറ്റ് വീഴ്ത്താന്‍ പതിവിലും കൂടുതല്‍ ഓവറുകള്‍ ബുമ്രയെക്കൊണ്ട് അറിയിക്കേണ്ടി വന്നു ക്യാപ്റ്റന്‍ രോഹിത്തിന്. 

നൂറു റണ്‍സിന് താഴെ ആള്‍ ഔട്ട് ആകേണ്ടി വന്നാലും ആക്രമിച്ചു കളിക്കുകയാണ് വേണ്ടതെന്ന് നേരത്തെ ഗംഭീര്‍ പറഞ്ഞിരുന്നു. ഈ ശൈലിയാണിപ്പോള്‍ നിരന്തരം വിമര്‍ശിക്കപ്പെടുന്നത്. എന്ത് തന്നെയായാലും ദ്രാവിഡിന്റെ  പടിയിറങ്ങുമ്പോഴുള്ള അവസ്ഥയല്ല നിലവില്‍ ഇന്ത്യന്‍ ടീമിന്റേത്.