മുംബൈ: ആസ്‌ത്രേലിയക്കെതിരായ ബോര്‍ഡര്‍ ഗാവസ്‌കര്‍ ട്രോഫി പരമ്പരയിലെ തോല്‍വിക്കു പിന്നാലെ ബിസിസിഐയോട് ഇംഗ്ലണ്ടിനെതിരായ ട്വന്റി20, ഏകദിന പരമ്പരകളില്‍ തന്നെ പരിഗണിക്കരുതെന്ന് ആവശ്യപ്പെട്ട് കെഎല്‍ രാഹുല്‍. 

ഈ മാസം ജനുവരി 22നാണ് ട്വന്റി20 ഇംഗ്ലണ്ടിനെതിരായ പരമ്പരയിലെ ആദ്യ മത്സരം. ഈ പരമ്പരകളില്‍ തന്നെ ഉള്‍പ്പെടുത്തരുതെന്ന് രാഹുല്‍ അജിത് അഗാര്‍ക്കര്‍ ചെയര്‍മാനായ സെലക്ഷന്‍ കമ്മിറ്റിയെ അറിയിച്ചതായാണു റിപ്പോര്‍ട്ടുകള്‍. രാഹുലിന് വിശ്രമം അനുവദിക്കുകയാണെങ്കില്‍ ട്വന്റി20 പരമ്പരയില്‍ ഇന്ത്യയുടെ വിക്കറ്റ് കീപ്പര്‍ ബാറ്ററായ സഞ്ജുവിന് ഏകദിന ടീമിലേക്കും വിളി വന്നേക്കും.

ഇംഗ്ലണ്ടിനെതിരായ ഏകദിന പരമ്പരയില്‍ സഞ്ജു സാംസണും റിഷഭ് പന്തും വിക്കറ്റ് കീപ്പര്‍മാരാകാനാണു സാധ്യത. ഇംഗ്ലണ്ടിനെതിരായ ഏകദിന പരമ്പരയിലെ ടീമിനെ തന്നെ ചാംപ്യന്‍സ് ട്രോഫിയിക്കും അയക്കാനാണു ബിസിസിഐ പദ്ധതിയിടുന്നത്. ഇംഗ്ലണ്ടിനെതിരായ പരമ്പരയില്‍ വിശ്രമം ആവശ്യപ്പെട്ടെങ്കിലും ചാമ്പ്യന്‍സ് ട്രോഫിയില്‍ കളിക്കാന്‍ തയാറാണെന്നും രാഹുല്‍ സെലക്ടര്‍മാരെ വിവരമറിയിച്ചിട്ടുണ്ട്. 

ബോര്‍ഡര്‍  ഗാവസ്‌കര്‍ ട്രോഫി ഇന്ത്യ കൈവിട്ട പരമ്പരയില്‍ 10 ഇന്നിങ്‌സുകളിലായി 276 റണ്‍സെടുക്കാനേ രാഹുലിനു കഴിഞ്ഞുള്ളൂ. ട്വന്റി20യില്‍ മികച്ച ഫോമില്‍ കളിക്കുന്ന സഞ്ജുവിനെ കണ്ടില്ലെന്ന് നടിക്കാന്‍ ഇത്തവണ സെലക്ടര്‍മാര്‍ക്ക്  കഴിയില്ല.