ബോളണ്ട് പാർക്ക്: സൗത്ത് ആഫ്രിക്ക ടി-20 ലീഗിൽ ചരിത്രംകുറിച്ച് ദിനേശ് കാർത്തിക്. സൺറൈസേഴ്സ് ഈസ്റ്റേൺ കേപ്പിനെതിരായ മത്സരത്തിൽ പാർൾ റോയൽസിനായി കളത്തിലറങ്ങിയാണ് ദിനേശ് കാർത്തിക് പുതിയ ചരിത്രമെഴുതിയത്. എസ്എ ടി-20യിൽ കളിക്കുന്ന ആദ്യ ഇന്ത്യൻ താരമായാണ് ദിനേശ് കാർത്തിക് മാറിയത്. ഐപിഎൽ 2024ന് ശേഷം ഇന്ത്യൻ ക്രിക്കറ്റിൽ നിന്നും വിരമിക്കൽ പ്രഖ്യാപിച്ച കാർത്തിക് സൗത്ത് ആഫ്രിക്കൻ ലീഗിലേക്ക് ചുവടുവെക്കുകയായിരുന്നു. 

ഇന്ത്യൻ ക്രിക്കറ്റിൽ ഐപിഎല്ലിൽ നിന്നും ആഭ്യന്തര ക്രിക്കറ്റിൽ നിന്നും വിരമിച്ചില്ലെങ്കിൽ ഒരു ഇന്ത്യൻ താരത്തിന് വിദേശ ടി-20 ലീഗുകളിൽ കളിക്കാൻ സാധിക്കില്ല. അതുകൊണ്ട് തന്നെ ഇന്ത്യൻ ക്രിക്കറ്റിൽ നിന്ന് വിരമിച്ച കാർത്തിക്കിന് ലോകത്തിലെ ഏത് വിദേശ ലീഗിലും കളിക്കാൻ സാധിക്കും. എന്നാൽ നിലവിൽ കാർത്തിക്കിന് ഐപിഎല്ലിലോ ഇന്ത്യൻ ആഭ്യന്തര ക്രിക്കറ്റിലോ കളിക്കാൻ കഴിയില്ല. ബിസിസിഐയുടെ നിയമപ്രകാരം ഒരു താരം വിദേശ ലീഗിൽ കളിച്ചാൽ പിന്നെ ഇന്ത്യൻ ക്രിക്കറ്റിലേക്ക് തിരിച്ചുവരാൻ കഴിയില്ല.

ആദ്യ മത്സരത്തിൽ തന്നെ കാർത്തിക്കിന്റെ പാർൾ റോയൽസ് ഒമ്പത് വിക്കറ്റിന്റെ തകർപ്പൻ വിജയമാണ് സ്വന്തമാക്കിയത്. മത്സരത്തിൽ ടോസ് നേടിയ സൺറൈസേഴ്‌സ് ബാറ്റിംഗ് തെരഞ്ഞെടുക്കുകയായിരുന്നു. ആദ്യ ബാറ്റ് ചെയ്ത സൺറൈസേഴ്‌സ് 20 ഓവറിൽ അഞ്ചു വിക്കറ്റ് നഷ്ടത്തിൽ 175 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ റോയൽസ് 18.4  ഓവറിൽ ഒരു വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു.