ബാംഗ്ലൂർ: ഇന്ത്യൻ ക്രിക്കറ്റിൽ ചരിത്രം കുറിച്ച് മുംബൈ താരം ഇറാ ജാദവ്. അണ്ടർ 19 വനിതാ ഏകദിന ട്രോഫിയിൽ ട്രിപ്പിൾ സെഞ്ച്വറി നേടിയാണ് ഇറാ ജാദവ് ചരിത്രത്തിലേക്ക് നടന്നുകയറിയത്. ബാംഗ്ലൂരിലെ ആളൂർ സ്റ്റേഡിയത്തിൽ മേഘാലയയ്‌ക്കെതിരെയുള്ള മത്സരത്തിൽ 157 പന്തിൽ പുറത്താകാതെ 346 റൺസ് നേടിയാണ് മുംബൈയുടെ ഈ 14കാരി തിളങ്ങിയത്. 42 ഫോറുകളും 16 സിക്‌സറുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്. 

ഈ മിന്നും പ്രകടനങ്ങൾക്ക് പിന്നാലെ ലിമിറ്റഡ് ഓവർ ക്രിക്കറ്റിൽ ട്രിപ്പിൾ സെഞ്ച്വറി നേടുന്ന ആദ്യ ഇന്ത്യൻ വനിതാ താരമായാണ് ഇറാ ജാദവ് മാറിയത്. ഇതിനു പുറമെ ബിസിസിഐ സംഘടിപ്പിക്കുന്ന ഒരു ടൂർണമെൻ്റിൽ ട്രിപ്പിൾ സെഞ്ച്വറി നേടുന്ന ആദ്യ താരമായും ഇറാ ജാദവ് മാറി. ഈ തകർപ്പൻ ട്രിപ്പിൾ സെഞ്ച്വറിയുടെ കരുത്തിൽ മേഖാലയക്കെതിരെ 563 എന്ന പടുകൂറ്റൻ ടോട്ടലാണ് മുംബൈ നേടിയത്. 

മത്സരത്തിൽ ഇറാ ജാദവിന് പുറമെ ഹർലി ഗാല സെഞ്ച്വറിയും നേടി തിളങ്ങി. 79 പന്തിൽ 116 റൺസ് ആണ് ഹാർലി നേടിയത്. ഹാർലിക്കൊപ്പം രണ്ടാം വിക്കറ്റിൽ 274 റൺസിൻ്റെ കൂട്ടുകെട്ടാണ് ഇറാ ജാദവ് പടുത്തുയർത്തിയത്. പിന്നീട് ക്രീസിൽ എത്തിയ ദീക്ഷ പവാറുമായി 186 റൺസിൻ്റെ കൂട്ടുകെട്ടും ഇറാ നേടി. മത്സരത്തിൽ മേഘാലയയുടെ മൂന്ന് ബൗളർമാർ ആണ് 100+ റൺസ് വഴങ്ങിയത്.വിജയലക്ഷ്യം പിന്തുടർന്നിറങ്ങിയ മേഘാലയ 19 റൺസിനാണ് പുറത്തായത്. 544 റൺസിൻ്റെ കൂറ്റൻ വിജയമാണ് മുംബൈ സ്വന്തമാക്കിയത്.