മസ്‌കത്ത്: ഒമാനിലെ സോഹാര്‍ നഗരത്തിലെ ഒരു കമ്പനിയുടെ ലബോറട്ടറിയില്‍ നിന്ന് വിഷാംശമുള്ള സള്‍ഫര്‍ ഡൈ ഓക്‌സൈഡ് വാതകം ചോര്‍ന്നതായി അധികൃതര്‍ റിപ്പോര്‍ട്ട് ചെയ്തു. സംഭവത്തില്‍ ആളപായമില്ലെന്നും അപകടം പൂര്‍ണമായി നിയന്ത്രണവിധേയമാക്കിയെന്നും സിവില്‍ ഡിഫന്‍സ് ആന്‍ഡ് ആംബുലന്‍സ് അതോറിറ്റി അറിയിച്ചു.

ALSO READ: അനധികൃതമായി ഒമാനിലേക്ക് പ്രവേശിക്കാന്‍ ശ്രമിച്ച 18 പേര്‍ അറസ്റ്റില്‍

വടക്കന്‍ അല്‍ ബാത്തിന നോര്‍ത്ത് ഗവര്‍ണറേറ്റിന്റെ തലസ്ഥാനവും ഒമാനിലെ പ്രധാന നഗരവുമായ സോഹാറില്‍ ഞായറാഴ്ചയാണ് സംഭവം നടന്നത്. അപകടകരമായ വസ്തുക്കള്‍ കൈകാര്യം ചെയ്യുന്നതില്‍ വിദഗ്ധരായ ടീം വേഗത്തില്‍ വാതക ചോര്‍ച്ച സുരക്ഷിതമായി നിയന്ത്രണവിധേയമാക്കി.

സള്‍ഫര്‍ ഡൈ ഓക്‌സൈഡ് വാതകം മനുഷ്യന്റെ ആരോഗ്യത്തിനും പരിസ്ഥിതിക്കും ഹാനികരമാണ്. പ്രത്യേകിച്ച് ഉയര്‍ന്ന സാന്ദ്രതയില്‍ ദീര്‍ഘനേരം സമ്പര്‍ക്കം പുലര്‍ത്തുമ്പോള്‍ ഇത് അപകടകരമാണ്. അതോറിറ്റി പങ്കുവെച്ച വീഡിയോയില്‍, സംരക്ഷണ വസ്ത്രങ്ങള്‍ ധരിച്ച രണ്ട് ജീവനക്കാര്‍ ലബോറട്ടറിയില്‍ പ്രവേശിച്ച് ചോര്‍ച്ച നിയന്ത്രിക്കുന്നതും തുടര്‍ന്ന് അണുനാശിനി ഉപയോഗിച്ച് സുരക്ഷ ഉറപ്പാക്കുന്നതും കാണാം.

ALSO READ: മസ്‌കത്ത് വിമാനത്താവളത്തില്‍ അഞ്ചുകിലോ കഞ്ചാവുമായി ഇന്ത്യക്കാരനെ കൈയോടെ പൊക്കി കസ്റ്റംസ് | Video

നേരത്തെ, ഏപ്രിലില്‍ ഒമാനിലെ ഖുറയ്യത്ത് നഗരത്തില്‍ ഒരു വാണിജ്യ കെട്ടിടത്തില്‍ ഗ്യാസ് സ്‌ഫോടനം നടന്നിരുന്നു. അയല്‍ കെട്ടിടത്തെയും ബാധിച്ച ഈ സംഭവത്തില്‍ നിരവധി പേര്‍ക്ക് പരുക്കേറ്റിരുന്നു.

A toxic gas leak at a laboratory in Oman was swiftly brought under control by emergency teams. Authorities confirmed there were no injuries or casualties in the incident.