പത്തനംതിട്ട: അഞ്ചു വര്‍ഷത്തിനിടെ 60ലേറെ പേര്‍ പീഡനത്തിനിരയാക്കിയെന്ന ദലിത് പെണ്‍കുട്ടിയുടെ വെളിപ്പെടുത്തലില്‍ പിടിയിലായവരുടെ എണ്ണം 44 ആയി. പത്തനംതിട്ട ടൗണ്‍ സ്റ്റേഷനില്‍ രജിസ്റ്റര്‍ ചെയ്ത കേസിലാണ് പുതിയ അറസ്റ്റുണ്ടായിരിക്കുന്നത്. അതേസമയം, പെണ്‍കുട്ടിയുടെ രഹസ്യമൊഴി രേഖപ്പെടുത്തി.  അടൂര്‍ ഫസ്റ്റ് ക്ലാസ് മജിസ്‌ട്രേറ്റാണ് മൊഴി രേഖപ്പെടുത്തിയത്. 

13 വയസുമുതല്‍ പെണ്‍കുട്ടി അതിക്രൂരമായ പീഡനങ്ങള്‍ ഏറ്റുവാങ്ങേണ്ടിവന്ന സംഭവത്തില്‍ ഉള്‍പ്പെട്ടത് 58 പ്രതികളാണെന്നത് സംസ്ഥാനത്തിന്റെ ചരിത്രത്തില്‍ തന്നെ ആദ്യമാണ്.

കേസില്‍ മുഴുവന്‍ പ്രതികളെയും പൊലിസ് തിരിച്ചറിഞ്ഞിട്ടുണ്ട്. വിദേശത്തുള്ള പ്രതികളിലൊരാളെ നാട്ടിലെത്തിക്കാനുള്ള നീക്കത്തിലാണ് അന്വേഷണ സംഘം. പെണ്‍കുട്ടി അഞ്ചു തവണ കൂട്ടബലാത്സംഗത്തിന് ഇരയായതായും പൊലിസ് കണ്ടെത്തി. പെണ്‍കുട്ടിയുടെ ഇതുവരെയുള്ള മൊഴിയനുസരിച്ച് ഇനി 13 പ്രതികളെക്കൂടി പിടികൂടാനുണ്ട്. പത്തനംതിട്ട പൊലിസ് സ്റ്റേഷനില്‍ 11 കേസുകളിലായി 26 അറസ്റ്റും ഇലവുംതിട്ട പൊലിസ് സ്റ്റേഷനില്‍ 16 കേസുകളിലായി 14 അറസ്റ്റും പന്തളത്ത് ഒരു കേസില്‍ 2 അറസ്റ്റും നടന്നു.

റാന്നി മന്ദിരംപടിയിലെ റബര്‍ തോട്ടത്തിനു സമീപം നിര്‍ത്തിയിട്ട കാറില്‍വച്ചും പത്തനംതിട്ട ജനറല്‍ ആശുപ്രതിയിലും പ്രക്കാനം തോട്ടുപുറത്ത് വാഹനത്തില്‍വച്ചും കൂട്ടബലാത്സംഗത്തിന് ഇരയായിട്ടുണ്ട്.

പെണ്‍കുട്ടിയെ ബാലാവകാശ കമ്മിഷന്‍ അംഗം എന്‍.സുനന്ദ ഇന്നലെ സന്ദര്‍ശിച്ചു. കുട്ടിയുടെ ആരോഗ്യനില തൃപ്തികരമാണെന്ന് ഡോക്ടര്‍മാര്‍ കമ്മിഷനെ അറിയിച്ചു. ആശ്വാസനിധിയില്‍ നിന്നും എത്രയും വേഗം ധനസഹായം അനുവദിക്കാന്‍ ജില്ലാ ശിശു സംരക്ഷണ ഓഫിസര്‍ക്ക് കമ്മിഷന്‍ നിര്‍ദേശം നല്‍കി. കേസില്‍ ഉള്‍പ്പെട്ട ഒരാളും രക്ഷപ്പെടാതെയുള്ള പഴുതടച്ച അന്വേഷണമാണ് നടക്കുന്നതെന്ന് പ്രത്യേക അന്വേഷണ സംഘവുമായുള്ള കൂടിക്കാഴ്ചക്ക് ശേഷം കമ്മിഷന്‍ അംഗം പറഞ്ഞു.