തൊടുപുഴ: വാഹനക്ഷാമം മൂലം പ്രതിസന്ധിയിലായ മോട്ടോർ വാഹന വകുപ്പിന് നേരിയ ആശ്വാസമേകി 20 വാഹനങ്ങൾ അനുവദിച്ചു. പ്ലാൻ ഫണ്ട് ഉപയോഗിച്ച് പുതുതായി വാങ്ങിയ മഹീന്ദ്ര ബൊലെറോ വാഹനങ്ങളാണ് വിവിധ ആർ.ടി / സബ് ആർ.ടി ഓഫിസുകൾക്ക് അനുവദിച്ച് സീനിയർ ഡെപ്യൂട്ടി ട്രാൻസ്‌പോർട്ട് കമ്മിഷണർ രാജീവ്.ആർ ഉത്തരവിറക്കിയത്. 15 വർഷമായതിനെത്തുടർന്ന് രജിസ്‌ട്രേഷൻ കാലാവധി കഴിഞ്ഞ വാഹനങ്ങൾ കൂട്ടത്തോടെ കട്ടപ്പുറത്തായതാണ് പ്രതിസന്ധി രൂക്ഷമാക്കിയത്. എം.വി.ഡി യുടെ 74 വാഹനങ്ങളാണ് ഇത്തരത്തിൽ നിരത്തൊഴിഞ്ഞത്. 

അതേസമയം ഇപ്പോൾ അനുവദിച്ച വാഹനങ്ങൾ ഒന്നിലധികം ഓഫിസുകൾ പങ്കുവച്ച് ഉപയോഗിക്കാനാണ് നിർദേശം. ഇത് പ്രായോഗിക ബുദ്ധിമുട്ടുകൾ ഉണ്ടാക്കുമെന്ന് ഉദ്യോഗസ്ഥർ പറയുന്നു. ഡീസൽ ബിൽ അടക്കം പ്രശ്‌നമാകാൻ സാധ്യതയുണ്ട്. വാഹനങ്ങളുടെ ഉത്തരവാദിത്വം സംബന്ധിച്ച തർക്കവും ഉണ്ടായേക്കാമെന്നാണ് വിലയിരുത്തൽ. പത്തനംതിട്ട, വടകര ആർ.ടി ഓഫിസുകൾക്കും നെടുമങ്ങാട്, നെയ്യാറ്റിൻകര, കൊട്ടാരക്കര, റാന്നി, തിരുവല്ല, മാവേലിക്കര, ചങ്ങനാശേരി, വൈക്കം, പാല, തൊടുപുഴ, വണ്ടിപ്പെരിയാർ, ആലുവ, മട്ടാഞ്ചേരി, വടക്കാഞ്ചേരി, ചിറ്റൂർ, മണ്ണാർക്കാട്, വടകര, മാനന്തവാടി സബ് ആർ.ടി ഓഫിസുകൾക്കുമാണ് ഓരോ വാഹനം വീതം അനുവദിച്ചിരിക്കുന്നത്.

പരിശോധന നിലച്ചതോടെ പിഴയിനത്തിൽ സർക്കാരിന് ലഭിക്കേണ്ട ഭീമമായ തുക നഷ്ടപ്പെടുകയാണെന്ന് കാണിച്ച് ട്രാൻസ്‌പോർട്ട് കമ്മിഷണറായിരുന്ന എസ്. ശ്രീജിത്ത് ഗതാഗത വകുപ്പ് പ്രിൻസിപ്പൽ സെക്രട്ടറിക്ക് കത്ത് നൽകിയിരുന്നു. 
ഒരു എം.വി.ഐ ഒരു മാസം കുറഞ്ഞത് 150 നിയമലംഘനങ്ങൾ കണ്ടെത്തണമെന്നും രണ്ട് ലക്ഷം രൂപ പിഴയീടാക്കണമെന്നുമുള്ള 2019 ലെ സർക്കുലർ നിലനിൽക്കുന്നുണ്ട്. വാഹനമില്ലത്തതിനാൽ ഇത്തരം എൻഫോഴ്‌സ്‌മെന്റ് പ്രവർത്തനങ്ങൾ താളംതെറ്റിയിരുന്നു.