ഡൽഹി: മെട്രോയിൽ യാത്ര ചെയ്യുന്ന വിദ്യാർത്ഥികൾക്ക് ഇളവ് നൽകണമെന്ന് ആവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് കത്തയച്ച് അരവിന്ദ് കെജ്‌രിവാൾ. വിദ്യാർത്ഥികൾ ഏറ്റവുമധികം ഉപയോഗിക്കുന്ന ഒന്നാണ് മെട്രോ സേവനം. വിദ്യാർത്ഥികളുടെ യാത്രാ ചെലവ് കുറയ്ക്കുന്നതിനായി 50 ശതമാനം ഇളവ് വേണമെന്ന് ആവശ്യപ്പെട്ടാണ് കെജ്‌രിവാൾ മോദിക്ക് തുറന്ന കത്തെഴുതിയത്.

കേന്ദ്ര- ഡൽഹി സർക്കാർ ചേർന്നാണ് മെട്രോ പ്രൊജക്റ്റ് ആരംഭിച്ചത്. അതിനാൽ തന്നെ മെട്രോയുടെ  ചെലവ് പങ്കിടുന്നത് ഇരുകൂട്ടരും ചേർന്നാണ്. വിദ്യാർത്ഥികൾക്കായി സൗജന്യ യാത്ര ഒരുക്കാനാണ് ആം ആദ്മി പാർട്ടി തീരുമാനം. ഞങ്ങളും ബസ് യാത്ര പൂർണമായും സൗജന്യമാക്കാൻ ഒരുങ്ങുകയാണെന്നും, ഈ നിർദേശം അംഗീകരിക്കുമെന്ന് പ്രതീക്ഷിക്കുന്നതായും"- കെജ്‌രിവാൾ പോസ്റ്റിൽ വ്യക്തമാക്കി.

ഡൽഹിയിൽ നിയമസഭാ തെരഞ്ഞെടുപ്പ് നടക്കാനിരിക്കെയാണ് കെജ്‌രിവാളിന്റെ കത്ത്. ഫെബ്രുവരി അഞ്ചിനാണ് ഡൽഹി നിയമസഭയുടെ തെരഞ്ഞെടുപ്പ് നടക്കുന്നത്. ഫെബ്രുവരി എട്ടിനാണ് വോട്ടെണ്ണൽ. എഎപി, ബിജെപി, കോൺഗ്രസ് തുടങ്ങിയ പാർട്ടികളുടെ ശക്തമായ മത്സരമാണ് ദേശീയ തലസ്ഥാനത്ത് നടക്കാൻ പോകുന്നത്. ഇതിനകം തന്നെ മൂന്ന് പാർട്ടികളും പല തരം വാഗ്ദാനങ്ങളും നൽകി കഴിഞ്ഞു.

Delhi CM Arvind Kejriwal has written to PM Narendra Modi, requesting a metro fare concession for students, aiming to make commuting more affordable for them.