'നന്ദി..വിധിയില്‍ സന്തോഷം..എന്റെ മകന്‍...'വാക്കുകള്‍ മുഴുമിപ്പിക്കാനാകാതെ ആ അമ്മ തേങ്ങി. ഒരായുസ്സില്‍ അനുഭവിക്കാവുന്ന മുഴുവന്‍ വേദനയും സഹിച്ച് ഇഞ്ചിഞ്ചായി മകന്‍ മരിച്ചു കൊണ്ടിരിക്കുന്നത് കണ്ടു നിന്ന അവര്‍ക്ക് ഒന്നും പറയാനാവുന്നില്ലായിരുന്നു. ദൈവം നീതിമാനായ ജഡ്ജിയുടെ രൂപത്തില്‍ വന്നു. കണ്ടു നിന്നവരെ മുഴുവന്‍ ഈറനണിയിച്ച് ഷാരോണിന്റെ മാതാപിതാക്കള്‍ പൊട്ടിക്കരഞ്ഞു. 

അതേസമയം നിര്‍വികാരയായി നിന്നാണ് ഗ്രീഷ്മ തനിക്ക് വധശിക്ഷയെന്ന വിധി കേട്ടത്. മൂന്നാം പ്രതിയും ഗ്രീഷ്മയുടെ അമ്മാവനുമായ നിര്‍മ്മല കുമാരന്‍ നായര്‍ക്ക് മൂന്നു വര്‍ഷം തടവു ശിക്ഷയാണ്. നെയ്യാറ്റിന്‍കര അഡീഷണല്‍ സെഷന്‍സ് കോടതിയുടേതാണ് വിധി. ആസൂത്രിത കൊലപാതകമാണ് നടന്നതെന്ന് കോടതി ചൂണ്ടിക്കാട്ടി. നേരത്തേയും വധശ്രമമുണ്ടായി. വീണ്ടു വീണ്ടും കുറ്റകൃത്യം നടത്തിയെന്നും കോടതി പറഞ്ഞു.

ഇവര്‍ കുറ്റക്കാരെന്ന് കഴിഞ്ഞ ദിവസം കോടതി കണ്ടെത്തിയിരുന്നു. ഷാരോണിനെ ഒഴിവാക്കാന്‍ കാമുകിയായ ഗ്രീഷ്മ കഷായത്തില്‍ കീടനാശിനി കലര്‍ത്തി കൊലപ്പെടുത്തിയെന്നായിരുന്നു കണ്ടെത്തല്‍. രണ്ടാം പ്രതിയായിരുന്ന ഗ്രീഷ്മയുടെ മാതാവിനെതിരെ തെളിവില്ലാത്തതിനാല്‍ അവരെ വെറുതെ വിടുകയായിരുന്നു.

2022 ഒക്ടോബര്‍ 14 ന് വീട്ടിലേക്ക് വിളിച്ചുവരുത്തി ഗ്രീഷ്മ കീടനാശിനി കലര്‍ത്തിയ കഷായം ഷാരോണിന് നല്‍കുകയായിരുന്നു. ഒക്ടോബര്‍ 25നാണ് ചികിത്സയിലിരിക്കെ ഷാരോണ്‍ രാജ് മരിച്ചത്.