കൊൽക്കത്ത: ഇന്ത്യ-ഇംഗ്ലണ്ട് അഞ്ചു ടി-20 മത്സരങ്ങളുടെ പരമ്പരക്ക് നാളെയാണ് തുടക്കം കുറിക്കുന്നത്. കൊൽക്കത്ത ഈഡൻ ഗാർഡനിൽ രാത്രി 7.00നാണ് മത്സരം നടക്കുക. ഈ മത്സരത്തിൽ ഇന്ത്യൻ യുവതാരം തിലക് വർമ്മയെ കാത്തിരിക്കുന്നത് ഒരു ചരിത്രനേട്ടമാണ്. മത്സരത്തിൽ സെഞ്ച്വറി നേടാൻ തിലക് വർമ്മക്ക് സാധിച്ചാൽ ഇന്റർനാഷണൽ ടി-20യിൽ തുടർച്ചയായ മൂന്ന് സെഞ്ച്വറികൾ നേടുന്ന ആദ്യ താരമായാവും തിലക് മാറുക. 

2024 നവംബറിൽ സൗത്ത് ആഫ്രിക്കയ്‌ക്കെതിരായ ടി-20 പരമ്പരയിലെ പരമ്പരയിലെ മൂന്നാമത്തെയും നാലാമത്തെയും മത്സരങ്ങളിൽ തിലക് സെഞ്ച്വറി നേടിയിരുന്നു. അതുകൊണ്ട് തന്നെ ഈഡൻ ഗാർഡനിൽ കൂടി സെഞ്ച്വറി നേടിയാൽ ഈ ചരിത്രനേട്ടം തിലകിന് തന്റെ പേരിൽ എഴുതിച്ചേർക്കാൻ സാധിക്കും. 

നേരത്തെ തന്നെ ടി-20 ക്രിക്കറ്റിൽ തുടർച്ചയായി മൂന്ന് മത്സരങ്ങളിൽ തിലക് സെഞ്ച്വറി നേടിയിട്ടുണ്ട്. സയ്യിദ് മുഷ്താഖ് അലി ട്രോഫിയിൽ മേഘാലയയ്‌ക്കെതിരെയുള്ള മത്സരത്തിൽ ആയിരുന്നു ഹൈദരാബാദ് താരമായ തിലക് സെഞ്ച്വറി നേടിയത്. ഇപ്പോൾ അന്താരാഷ്ട്ര തലത്തിലും ഇതേ നേട്ടം ആവർത്തിക്കാനുള്ള സുവർണാവസരമാണ് തിലകിന്റെ മുന്നിലുള്ളത്.