ദുബൈ: 2024 അവസാന പാദത്തോടെ ഷാര്‍ജ നഗരത്തിലെ പാര്‍ക്കിംഗ് സംവിധാനത്തില്‍ ഒന്നിലധികം മാറ്റങ്ങള്‍ വരുത്തിയിരുന്നു. എങ്കിലും ഈ മാറ്റങ്ങളില്‍ ഒന്ന് ഇതുവരെ നടപ്പിലാക്കിയിട്ടില്ല.

യുഎഇയുടെ സാംസ്‌കാരിക തലസ്ഥാനമായ ഷാര്‍ജയില്‍, പാര്‍ക്കിംഗ് സ്ഥലങ്ങള്‍ സാധാരണയായി നീലയും വെള്ളയും നിറങ്ങള്‍ കൊണ്ടാണ് അടയാളപ്പെടുത്തിയിരിക്കുന്നത്. പാര്‍ക്കിംഗ് സ്ഥലങ്ങളുടെ ഉപയോഗത്തെയും ഫീസിനെയും കുറിച്ചുള്ള വ്യക്തമായ നിര്‍ദ്ദേശങ്ങളും ഇത്തരം സ്ഥലങ്ങളില്‍ ഉണ്ടാകാറുണ്ട്.

പ്രതിദിന പാര്‍ക്കിംഗ് ഫീസ് ഓപ്ഷന് പുറമെ, ഉപയോക്താക്കള്‍ക്ക് പ്രീപെയ്ഡ് പാര്‍ക്കിംഗ് സബ്‌സ്‌ക്രിപ്ഷനുകളും തിരഞ്ഞെടുക്കാം. ഇപ്രകാരം വ്യക്തികള്‍ക്കും ബിസിനസ് സ്ഥാപനങ്ങള്‍ക്കും അവരുടെ തിരഞ്ഞെടുത്ത പ്ലാനുകള്‍ക്കനുസരിച്ച് പണമടച്ചുള്ള പാര്‍ക്കിംഗ് സ്ഥലങ്ങള്‍ ഉപയോഗിക്കാം.

സ്വകാര്യ വ്യക്തികള്‍ക്ക് ഷാര്‍ജയിലെ എല്ലാ ഏരിയകള്‍ക്കോ അല്ലെങ്കില്‍ രണ്ട് പ്രത്യേക ഏരിയകള്‍ക്കോ വേണ്ടിയുള്ള വ്യക്തിഗത സബ്‌സ്‌ക്രിപ്ഷന്‍ തിരഞ്ഞെടുക്കാം. അതേസമയം ബിസിനസ് സ്ഥാപനങ്ങള്‍ക്ക് നഗരം മുഴുവന്‍ പാര്‍ക്കിംഗ് പ്ലാന്‍ തിരഞ്ഞെടുക്കാം. തിരഞ്ഞെടുത്ത സബ്‌സ്‌ക്രിപ്ഷന്‍ അനുസരിച്ച് ഫീസ് വ്യത്യാസപ്പെടുമെന്നു മാത്രം. 

ഷാര്‍ജയിലെ പാര്‍ക്കിംഗ് സംവിധാനത്തില്‍ അടുത്തിടെ വരുത്തിയ മൂന്ന് മാറ്റങ്ങള്‍ ഇതാ.

ഏഴ് ദിവസത്തെ പാര്‍ക്കിംഗ് സോണുകള്‍
2024 ഒക്ടോബറില്‍ ഷാര്‍ജയിലെ ഏഴ് ദിവസത്തെ സോണുകള്‍ക്കായി പുതിയ സമയക്രമം പ്രഖ്യാപിച്ചിരുന്നു. 2024 നവംബര്‍ 1 മുതല്‍ നടപ്പിലാക്കിയ സമയക്രമനുസരിച്ച്, വാഹനമോടിക്കുന്നവര്‍ രാവിലെ 8 മുതല്‍ അര്‍ദ്ധരാത്രി വരെ പാര്‍ക്കിങ്ങിന് പണം നല്‍കേണ്ടതുണ്ട്.

നഗരത്തിലുടനീളമുള്ള ഏഴ് ദിവസത്തെ പാര്‍ക്കിംഗ് സോണുകള്‍ നീല പാര്‍ക്കിംഗ് അടയാളങ്ങളാല്‍ ലേബല്‍ ചെയ്തിട്ടുണ്ട്. 16 മണിക്കൂര്‍ ദൈര്‍ഘ്യമുള്ള പണമടച്ചുള്ള ഈ പാര്‍ക്കിംഗ് സോണുകള്‍ ആഴ്ചയിലുടനീളവും പൊതു അവധി ദിവസങ്ങളിലും പ്രവര്‍ത്തിക്കും. വാഹനമോടിക്കുന്നവര്‍ക്ക് എസ്എംഎസ് വഴി പാര്‍ക്കിങ് ഫീസ് അടയ്ക്കാം. 

അല്‍ ദായിദിലെ പാര്‍ക്കിംഗ് ഫീസ്
ഷാര്‍ജയിലെ അല്‍ ദായിദ് സന്ദര്‍ശിക്കുന്നവര്‍ വാഹനം പാര്‍ക്ക് ചെയ്യുമ്പോള്‍ പാര്‍ക്കിംഗ് ഫീസ് നല്‍കണം. ഈ വര്‍ഷം ജനുവരി 1 മുതലാണ് ഇത് നിലവില്‍ വന്നത്. ശനിയാഴ്ച മുതല്‍ വ്യാഴം വരെ രാവിലെ 8 മണിക്കും രാത്രി 10 മണിക്കും ഇടയില്‍ ഇത് ബാധകമാണ്.

എന്നാല്‍ വെള്ളിയാഴ്ചകളില്‍ വാഹനമോടിക്കുന്നവരെ ഫീസ് അടയ്ക്കുന്നതില്‍ നിന്ന് ഒഴിവാക്കിയിട്ടുണ്ട്.

കല്‍ബ നഗരത്തിലെ പാര്‍ക്കിംഗ് ഫീസ്
ഈ വര്‍ഷം ഫെബ്രുവരി 1 മുതല്‍ കല്‍ബ നഗരത്തില്‍ പാര്‍ക്കിംഗ് ഫീസ് ബാധകമാകുമെന്ന് നഗര മുനിസിപ്പാലിറ്റി ഈ മാസം ആദ്യം പ്രഖ്യാപിച്ചിരുന്നു.

ശനിയാഴ്ച മുതല്‍ വ്യാഴം വരെ രാവിലെ 8 മുതല്‍ രാത്രി 10 വരെ ഫീസ് ബാധകമായിരിക്കും. ആഴ്ചയിലുടനീളം ഫീസ് ബാധകമായ സോണുകളിലും ഔദ്യോഗിക അവധി ദിവസങ്ങളിലും ഒഴികെ വെള്ളിയാഴ്ചകളില്‍ പാര്‍ക്കിംഗ് സൗജന്യമായി തുടരും.

These are the 3 main changes to the paid parking system in Sharjah