ന്യൂഡല്‍ഹി: കോഴിക്കോട് കിനാലൂരില്‍ എയിംസ് സ്ഥാപിക്കണമെന്ന ആവശ്യം രാജ്യസഭയില്‍ ഉന്നയിച്ച് പി.ടി ഉഷ എം.പി. സംസ്ഥാന സര്‍ക്കാര്‍ ഇതിനായി 153.46 ഏക്കര്‍ ഭൂമി ഏറ്റെടുത്തിട്ടുണ്ടെന്നും നിര്‍ദേശിക്കപ്പെട്ട പദ്ധതിക്കായി തന്റെ പി.ടി ഉഷ സ്‌കൂള്‍ ഓഫ് അത്ലറ്റിക്സില്‍ നിന്ന് അഞ്ച് ഏക്കര്‍ ഭൂമി നല്‍കിയിരുന്നുവെന്നും പി.ടി ഉഷ സഭയില്‍ വ്യക്തമാക്കി. 

മലബാറിന്റെ പ്രധാനഭാഗത്താണു കിനാലൂര്‍. നീലഗിരി, കോയമ്പത്തൂര്‍, മൈസൂരു, കുടക്, മലബാര്‍ പ്രദേശങ്ങളില്‍ ഉള്ളവര്‍ക്ക് എളുപ്പത്തില്‍ എത്താനാകും. ദേശീയപാതയില്‍നിന്ന് 23 കി.മീ ദൂരമേയുള്ളൂ. എല്ലാവര്‍ക്കും മികച്ച ചികിത്സ കിട്ടുന്ന എയിംസ് കേരളത്തിനു ലഭിക്കാന്‍ പ്രധാനമന്ത്രി നരേന്ദ്ര മോദിയുടെ ഇടപെടല്‍ അഭ്യര്‍ഥിക്കുന്നു''- ഉഷ പറഞ്ഞു.

കേന്ദ്ര ബജറ്റിന് മുന്നോടിയായി കേരളം സമര്‍പ്പിച്ച ആവശ്യങ്ങളില്‍ ഒന്നായിരുന്നു എയിംസ്. എം.കെ രാഘവന്‍ എം.പിയും എയിംസിനായി ആവശ്യം സമര്‍പ്പിച്ചിരുന്നു. എയിംസ് അനുവദിക്കുമെന്ന പ്രഖ്യാപനം വന്നയുടനെതന്നെ കേരളം കോഴിക്കോട് കിനാലൂരില്‍ എയിംസിനുവേണ്ടി സ്ഥലം കണ്ടെത്തുകയും നടപടിക്രമങ്ങള്‍ പാലിച്ച് രേഖാമൂലം കേന്ദ്രത്തെ അറിയിക്കുകയും ചെയ്തിരുന്നു.

അതേസമയം അടുത്തിടെ, കേരളത്തില്‍ എയിംസ് സ്ഥാപിച്ചാല്‍ അത് ആലപ്പുഴയില്‍ ആയിരിക്കണമെന്നാണ് തന്റെ താല്‍പ്പര്യമെന്ന് കേന്ദ്രമന്ത്രി സുരേഷ് ഗോപി അഭിപ്രായപ്പെട്ടിരുന്നു.