ഡെറാഡൂൺ: ഏകസിവിൽ കോഡ് (യു.യു.സി) നടപ്പാക്കി 10 ദിവസം പിന്നിട്ടപ്പോൾ ഉത്തരാഖണ്ഡിൽ ലിവിങ് റിലേഷനിൽ രജിസ്റ്റർ ചെയ്തത് ഒരു അപേക്ഷ മാത്രം. സംസ്ഥാന സർക്കാർ ഒരുക്കിയ യു.യു.സി പോർട്ടലിൽ ഒരു ലിവിങ് റിലേഷൻ രജിസ്‌ട്രേഷൻ മാത്രമാണ് ഇത്രയും ദിവസത്തിനുള്ളിൽ നടന്നതെന്നാണ് ഉദ്യോഗസ്ഥർ പറയുന്നത്. അഞ്ച് അപേക്ഷകൾ രജിസ്‌ട്രേഷനായി ലഭിച്ചിരുന്നെങ്കിലും നാലെണ്ണത്തിലുള്ള പരിശോധന തുടരുകയാണെന്നും ഉദ്യോഗസ്ഥർ പറഞ്ഞു.

ജനുവരി 27നാണ് ഉത്തരാഖണ്ഡിലെ ബി.ജെ.പി സർക്കാർ യു.യു.സി നടപ്പിലാക്കിയത്. ഇതോടെയാണ് വിവാഹം, വിവാഹമോചനം, ലിവിങ് റിലേഷൻ എന്നിവയ്ക്ക് യു.യു.സി പോർട്ടൽ വഴി രജിസ്‌ട്രേഷൻ നിർബന്ധമാക്കിയത്. അതേസമയം, ലിവിങ് റിലേഷൻ രജിസ്റ്റർ ചെയ്യാനുള്ള നിബന്ധനകൾ കർശനമാക്കിയതിനെതിരേ വിവിധ പൗരാവകാശ സംഘടനകളുടെ നേതൃത്വത്തിൽ പ്രതിഷേധം തുടരുകയാണ്. നിയമത്തിനെതിരേ കോടതിയെ സമീപിക്കാനൊരുങ്ങുകയാണ് വിവിധ വിഭാഗങ്ങൾ.