കോഴിക്കോട്: മുക്കത്ത് സങ്കേതം ഹോട്ടലിലെ ജീവനക്കാരിയെ പീഡിപ്പിക്കാന്‍ ശ്രമിച്ച കേസിലെ കൂട്ടുപ്രതികള്‍ കീഴടങ്ങി. ഇതേ ഹോട്ടലിലെ ജീവനക്കാരായ റിയാസ്, സുരേഷ് എന്നിവര്‍ താമരശ്ശേരി കോടതിയിലാണ് കീഴടങ്ങിയത്.  

കേസിലെ ഒന്നാം പ്രതി ഹോട്ടലുടമ ദേവദാസിനെ ഇന്നലെ അറസ്റ്റു ചെയ്ത്, തെളിവെടുപ്പ് നടത്തി റിമാന്‍ഡ് ചെയ്തിരുന്നു. റിയാസിനെയും സുരേഷിനെയും അറസ്റ്റ് ചെയ്ത ശേഷം മൂവരേയും ഒരുമിച്ച് കസ്റ്റഡിയില്‍ വാങ്ങാനാണ് പൊലീസ് ആലോചന. പെണ്‍കുട്ടിയുടെ രഹസ്യമൊഴി രേഖപ്പെടുത്തുന്ന നടപടികളും പൊലീസ് വൈകാതെ പൂര്‍ത്തിയാക്കും. 

ഹോട്ടല്‍ ജീവനക്കാരിയായ യുവതിയെ അര്‍ധരാത്രി താമസ സ്ഥലത്ത് അതിക്രമിച്ചു കയറി പീഡിപ്പിക്കാന്‍ ശ്രമിക്കുകയും ഇതിനെത്തുടര്‍ന്ന് യുവതി കെട്ടിടത്തിനു മുകളില്‍ നിന്ന് താഴേക്ക് ചാടുകയുമായിരുന്നു. സാരമായി പരുക്കേറ്റ യുവതി കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്.

 കുന്ദംകുളത്തു വച്ച് പൊലിസിനെ കബളിപ്പിച്ച് രക്ഷപ്പെടാനുള്ള ശ്രമത്തിനിടെയാണ് ദേവദാസ് പിടിയിലായത്. കോഴിക്കോട് റെയില്‍വെ സ്റ്റേഷനില്‍ കാര്‍ നിര്‍ത്തി ട്രെയിന്‍ വഴിയാണ് പോവുന്നതെന്ന് തെറ്റിദ്ധരിപ്പിച്ച് ബസില്‍ എറണാകുളത്തേക്ക് യാത്ര ചെയ്യുകയായിരുന്നു. വിവരമറിഞ്ഞ മുക്കം പൊലിസ് കണ്ടക്ടറുമായി സംസാരിച്ച് പ്രതി ബസിലുണ്ടന്ന് ഉറപ്പ് വരുത്തി കുന്ദംകുളം പൊലിസിനെ വിവരമറിയിക്കുകയായിരുന്നു. തുടര്‍ന്ന് ഇന്നലെ പുലര്‍ച്ചെ നാലോടെ പ്രതിയെ മുക്കം സ്റ്റേഷനില്‍ എത്തിച്ചു. 

ഇന്നലെ രാവിലെ 11 ഓടെ പെണ്‍കുട്ടി താഴേക്ക് ചാടിയ വീട്ടിലെത്തിച്ച് പൊലിസ് തെളിവെടുപ്പ് നടത്തി. വാടകയ്ക്ക് താമസിച്ചിരുന്ന വീടിന്റെ സമീപത്തെ സ്വകാര്യ ഹോട്ടലിലെ ജീവനക്കാരിയാണ് യുവതി. 

കഴിഞ്ഞ ശനിയാഴ്ച രാത്രിയാണ് സംഭവം നടന്നത്. ഹോട്ടല്‍ ഉടമയും മറ്റു രണ്ടു പേരും രാത്രി താന്‍ താമസിക്കുന്ന വീട്ടിലെത്തി ഉപദ്രവിക്കാന്‍ ശ്രമിച്ചപ്പോള്‍ രക്ഷപ്പെടാനായി താഴേക്ക് ചാടുകയായിരുന്നുവെന്നാണ് യുവതി പൊലിസിന് നല്‍കിയ മൊഴിയില്‍ പറയുന്നത്.