തിരുവനന്തപുരം: എട്ടാം ക്ലാസുകാരന്റെ കൈ എസ്.ഐ തിരിച്ച് ഒടിച്ചതായി പരാതി. പാളയം കുന്ന് ഗവ. ഹയര്‍ സെക്കണ്ടറി സ്‌കൂളിലെ വിദ്യാര്‍ഥി കാശിനാഥന്റെ കൈക്കാണ് പരിക്കേറ്റത്. അയിരൂര്‍ പൊലിസ് സ്റ്റേഷനിലെ എസ് ഐ രഞ്ജിത്തിനെതിരെയാണ് പരാതി. വസ്തു തര്‍ക്കവുമായി ബന്ധപ്പെട്ട് കുട്ടിയുടെ അച്ഛനെ കസ്റ്റഡിയില്‍ എടുക്കുന്നതിനിടെ ആയിരുന്നു സംഭവം. 

രാജേഷും അയല്‍വാസി വിജയമ്മയും തമ്മില്‍ വര്‍ഷങ്ങളായി വഴിതര്‍ക്കം നിലനിന്നിരുന്നു. അതിര്‍ത്തി പ്രശ്‌നവുമായി ബന്ധപ്പെട്ട് താന്‍ കെട്ടിയ വേലി വിജയമ്മയുടെ മരുമകന്‍ കൂടി ആയ ക്രൈം ബ്രാഞ്ച് ഡിവൈഎസ്പി പൊളിച്ചു മാറ്റി എന്ന് രാജേഷും കുടുംബവും ആരോപിക്കുന്നു. ഇതേ തുടര്‍ന്ന് തര്‍ക്കം ഉണ്ടാവുകയും അയിരൂര്‍ പൊലീസ് എത്തി ഇരുകൂട്ടരോടും സ്റ്റേഷനില്‍ എത്താന്‍ ആവശ്യപ്പെടുകയും ചെയ്തിരുന്നു.

പക്ഷേ ഹാജരാവാന്‍ നിര്‍ദേശിച്ച സമയത്തിന് മുന്നേ പൊലീസ് സംഘം വീട്ടിലെത്തി രാജേഷിനെ കസ്റ്റഡിയില്‍ എടുക്കുകയും, ഇത് തടയാന്‍ ശ്രമിച്ചപ്പോള്‍ എസ്‌ഐ കുട്ടിയുടെ കൈ പിടിച്ച് തിരിച്ചെന്നുമാണ് പരാതി. വേദന മാറാത്തതിനാല്‍ ആശുപത്രിയില്‍ കാണിച്ചപ്പോള്‍ കുട്ടിയുടെ കയ്യില്‍ പൊട്ടല്‍ കണ്ടെത്തിയിട്ടുണ്ട്.

രാജേഷിനെ കസ്റ്റഡിയിലെടുക്കാന്‍ ശ്രമിച്ചപ്പോള്‍ ബന്ധുക്കള്‍ ജീപ്പ് തടഞ്ഞു എന്നും അവരെ മാറ്റുക മാത്രമാണ് ചെയ്തതെന്നും പൊലീസ് പറഞ്ഞു. 75 കാരിയായ വിജയമ്മയെ മര്‍ദിച്ചു എന്ന് ആരോപിച്ചായിരുന്നു രാജേഷിനെ പൊലീസ് കസ്റ്റഡിയില്‍ എടുത്തത്. കോടതി റിമാന്‍ഡ് ചെയ്ത രാജേഷിന് പിന്നീട് ജാമ്യം ലഭിച്ചു.

Complaint that the police broke the arm of an 8th class student in Thiruvananthapuram