റിയാദ്: സഊദിയിലെ പുതിയ വിസാ നിയമം ഏറ്റവുമധികം തിരിച്ചടിയാകുക മലയാളികകളുള്‍പ്പെടെയുള്ള സമൂഹത്തിന്. 
ഒരു വര്‍ഷം കാലാവധിയുള്ള മള്‍ട്ടിപ്പിള്‍ എന്‍ട്രി വിസിറ്റ് വിസകള്‍ (Multiple-Entry Visit Visas)  താല്‍ക്കാലികമായി നിര്‍ത്തലാക്കിയതോടെ വിസിറ്റ് വിസയില്‍ വരാനിരുന്ന കുടുംബങ്ങള്‍ ഇനി മൂന്ന് മാസം വരെ നില്‍ക്കാവുന്ന സിംഗിള്‍ എന്‍ട്രി വിസകളെ (single-entry visas) ആശ്രയിക്കേണ്ടിവരും. ഒരു വര്‍ഷ കാലാവധിയുള്ള ബിസിനസ് വിസിറ്റ് വിസകളും നിര്‍ത്തിയിട്ടുണ്ട്. ഇന്ത്യയുള്‍പ്പെടെ കൂടുതല്‍ പ്രവാസികളുള്ള രാജ്യക്കാര്‍ക്കാണ് നിയന്ത്രണം ഏര്‍പ്പെടുത്തിയത്. സഊദിയില്‍ ഇന്ത്യയില്‍നിന്നുള്ള ഏറ്റവും വലിയ പ്രവാസി സമൂഹം മലയാളികളാണ്.

കഴിഞ്ഞദിവസമാണ് ഒരു വര്‍ഷം കാലാവധിയുള്ള സന്ദര്‍ശക വിസകള്‍ താല്‍ക്കാലികമായി നിര്‍ത്തലാക്കി സഊദി വിദേശകാര്യ മന്ത്രാലയത്തിന്റെ കോള്‍ സെന്ററില്‍ നിന്ന് അറിയിപ്പ് ലഭിച്ചത്. ഹജ്ജിന് മുന്നോടിയായാണ് നടപടിയെന്നാണ് റിപ്പോര്‍ട്ടുകള്‍. കഴിഞ്ഞവര്‍ഷം വിസിറ്റ് വിസകളിലെത്തിയവര്‍ ഹജ്ജ് സീസണില്‍മക്കയില്‍ പിടിയിലായിരുന്നു. ഹജ്ജിന് ശേഷം നിര്‍ത്തലാക്കിയ വിസകള്‍ പുനരാരംഭിച്ചേക്കാമെന്നാണ് സൂചന.

വിദേശകാര്യ മന്ത്രാലയത്തിന്റെ വെബ്‌സൈറ്റ് വഴി ഇപ്പോള്‍ മള്‍ട്ടിപ്പിള്‍ എന്‍ട്രി ഫാമിലി വിസിറ്റ് വിസക്ക് അപേക്ഷിക്കാന്‍ കഴിയുന്നില്ലെന്ന് ട്രാവല്‍ ഏജന്‍സികളും വ്യക്തമാക്കി. ആദ്യം ഇത് സാങ്കേതിക പ്രശ്‌നമാണെന്നാണ് കരുതിയതെങ്കിലും കള്‍ സെന്ററില്‍ ബന്ധപ്പെട്ടപ്പോഴാണ് സ്ഥിരീകരണം ലഭിച്ചത്. എന്നാല്‍ ഇക്കാര്യത്തില്‍ ഔദ്യോഗിക റിലീസുകള്‍ ഇറങ്ങിയിട്ടില്ല. പുതിയ നിയന്ത്രണം ഹജ്ജ്, ഉംറ, നയതന്ത്ര, തൊഴില്‍ വിസകളെ ബാധിക്കില്ലെന്നും മള്‍ട്ടിപ്പിള്‍ എന്‍ട്രി വിസകള്‍ ദുരുപയോഗം ചെയ്യപ്പെടുന്നുണ്ടെന്നും വിദേശകാര്യ മന്ത്രാലയ വക്താവ് പറഞ്ഞു. ചില സന്ദര്‍ശകര്‍ ദീര്‍ഘകാല വിസകളില്‍ സൗദിയില്‍ പ്രവേശിച്ച ശേഷം നിയമവിരുദ്ധമായി ജോലി ചെയ്യാനും അംഗീകാരമില്ലാതെ ഹജ്ജ് നിര്‍വഹിക്കാനും ശ്രമിക്കുന്നത് ശ്രദ്ധയില്‍ പെട്ടിട്ടുണ്ടെന്നും വക്താവ് പറഞ്ഞു. 

സഊദി അറേബ്യയിലേക്ക് വരാന്‍ പ്രവാസി കുടുംബങ്ങള്‍ ഏറ്റവുമധികം ഉപയോഗപ്പെടുത്തിയിരുന്നത് ഒരു വര്‍ഷം വരെ കാലാവധിയുള്ള മള്‍ട്ടിപ്പിള്‍ എന്‍ട്രി വിസകളാണ്. ഈ വിസകളിലെത്തിയാല്‍ രാജ്യത്ത് മൂന്ന് മാസം വരെ തുടര്‍ച്ചയായി താമസിക്കാം. കൂടാതെ ഓണ്‍ലൈന്‍ വഴിയോ സഊദിക്ക് പുറത്ത് പോയി വന്നോ വിസ പുതുക്കാനും കഴിയുമായിരുന്നു. ഇത്തരത്തില്‍ ഒരു വര്‍ഷം വരെ നില്‍ക്കാന്‍ കഴിയുമായിരുന്ന വിസയാണ് ഇപ്പോള്‍ നിര്‍ത്തിയത്. 

ഫെബ്രുവരി ഒന്നു മുതല്‍ നിരോധനം പ്രാബല്യത്തില്‍ വന്നിട്ടുണ്ടെന്നും പ്രാദേശിക അറബ് മാധ്യമങ്ങള്‍ റിപ്പോര്‍ട്ട് ചെയ്തു. ഇന്ത്യയെക്കൂടാതെ അല്‍ജീരിയ, ബംഗ്ലാദേശ്, ഈജിപ്ത്, എത്യോപ്യ, ഇന്തോനേഷ്യ, ഇറാഖ്, ജോര്‍ദാന്‍, മൊറോക്കോ, നൈജീരിയ, പാകിസ്ഥാന്‍, സുദാന്‍, തുണീഷ്യ, യെമന്‍ എന്നീ രാജ്യങ്ങളില്‍ നിന്നുള്ളവരെയാണ് ഈ തീരുമാനം ബാധിക്കുക. 

നിലവിലെ സ്റ്റാറ്റസ്

അറിയിപ്പ് വരുന്നതിന് മുമ്പായി വിസ സ്റ്റാമ്പ് ചെയ്തവര്‍ക്ക് പഴയതു പോലെ സഊദിയിലേക്ക് വരുന്നതിന് തടസ്സമില്ല. സഊദിയില്‍ നിലവില്‍ ഈ വിസകളിലുള്ളവര്‍ക്ക് അവ പുതുക്കി കാലാവധി പൂര്‍ത്തിയാക്കുകയും ചെയ്യാം. എന്നാല്‍, പുതുതായി ഈ വിസക്ക് അപേക്ഷിക്കാന്‍ കഴിയില്ല. ഉംറ വിസയിലെത്തുന്നവരെല്ലാം ഹജ്ജിന് മുന്നോടിയായി ഏപ്രില്‍ 28നകം മടങ്ങണമെന്ന നിര്‍ദേശവും സഊദി പുറപ്പെടുവിച്ചിട്ടുണ്ട്. പുതിയ സാഹചര്യത്തില്‍ വരുന്ന അവധിക്കാലത്ത് സഊദിയിലേക്ക് വരാന്‍ കഴിയുന്ന ഏക വിസാ സൗകര്യം സിംഗിള്‍ എന്‍ട്രി വിസ മാത്രമായി ചുരുങ്ങി. 90 ദിവസം വരെ സിംഗിള്‍ എന്‍ട്രി വിസക്ക് കാലാവധിയുണ്ട്. ഇതിനിടെ ഓരോ 30 ദിനമാകുമ്പോഴും 100 റിയാല്‍ അടച്ച് വിസ പുതുക്കുകയും വേണം. 90 ദിവസത്തിനുള്ളില്‍ സഊദി വിട്ടാല്‍ വിസ അസാധുവാകും. 

Saudi Arabia has introduced a new visa policy restricting travelers from 14 countries to single-entry visas. The decision, effective February 1, 2025, aims to curb unauthorized Hajj pilgrims entering through long-term visit visas.