ന്യൂഡല്‍ഹി: പാകിസ്ഥാന്റെ ഭീകര പ്രവര്‍ത്തനങ്ങള്‍ തുറന്നുകാട്ടാനും ഓപ്പറേഷന്‍ സിന്ധൂറിനെക്കുറിച്ച് വിശദീകരിക്കാനുമായി വിവിധ രാജ്യങ്ങള്‍ സന്ദര്‍ശിക്കുന്ന പ്രതിനിധി സംഘത്തില്‍ തന്നെയും ഉള്‍പ്പെടുത്തിയ കേന്ദ്രസര്‍ക്കാര്‍ തീരുമാനം ആദരവായി കാണുന്നുവെന്ന് കോണ്‍ഗ്രസ് നേതാവും തിരുവനന്തപുരം എംപിയുമായ ശശി തരൂര്‍. രാജ്യതാല്‍പര്യവുമായി ബന്ധപ്പെട്ട വിഷയങ്ങളില്‍ നിന്ന് മാറിനില്‍ക്കില്ലെന്നും തരൂര്‍ അറിയിച്ചു. ഇതിനൊപ്പം സംഘങ്ങളെ നയിക്കുന്ന ഏഴു പേരുടെ പട്ടികയും തരൂര്‍ എക്‌സില്‍ പങ്കുവച്ചു. 

I am honoured by the invitation of the government of India to lead an all-party delegation to five key capitals, to present our nation’s point of view on recent events.

When national interest is involved, and my services are required, I will not be found wanting.

Jai Hind! 🇮🇳 pic.twitter.com/b4Qjd12cN9

— Shashi Tharoor (@ShashiTharoor) May 17, 2025

കോണ്‍ഗ്രസ് നേതൃത്വം നിര്‍ദേശിച്ച പേരുകള്‍ തള്ളിയാണ് തരൂരിനെ കേന്ദ്രസര്‍ക്കാര്‍ പട്ടികയില്‍ ഉള്‍പ്പെടുത്തിയത്. മുന്‍ കേന്ദ്രമന്ത്രി ആനന്ദ് ശര്‍മ, ആസാമില്‍ നിന്നുള്ള മുതിര്‍ന്ന നേതാവ് ഗൗരവ് ഗൊഗോയ്, സയ്ദ് നാസിര്‍ ഹുസൈന്‍, രാജ് ബ്രാര്‍ എന്നിവരുടെ പേരുകളാണ് കോണ്‍ഗ്രസ് കേന്ദ്രത്തിനു മുന്നില്‍ വച്ചത്. 

പ്രതിനിധി സംഘത്തിലേക്ക് നാലംഗങ്ങളുടെ പേരുകള്‍ നിര്‍ദേശിക്കണമെന്ന് കേന്ദ്രമന്ത്രി കിരണ്‍ റിജ്ജു മല്ലികാര്‍ജുന്‍ ഖാര്‍ഗെയോട് ആവശ്യപ്പെട്ടിരുന്നു. ഇതിനെ തുടര്‍ന്നാണ് കോണ്‍ഗ്രസ് നേതൃത്വം നാലു പേരുകള്‍ മുന്നോട്ടുവച്ചത്. 

പ്രതിനിധി സംഘങ്ങളില്‍ ഒന്നിനെ തരൂരായിരിക്കും നയിക്കുക എന്ന് നേരത്തെ തന്നെ റിപ്പോര്‍ട്ടുകള്‍ ഉണ്ടായിരുന്നു. ഇന്ത്യ-പാക് സംഘര്‍ഷവുമായി ബന്ധപ്പെട്ട് കോണ്‍ഗ്രസ് നിലപാടിനു വിരുദ്ധമായി അഭിപ്രായ പ്രകടനം നടത്തിയ തരൂരിനെ കോണ്‍ഗ്രസ് ദേശീയ നേതൃത്വം താക്കീതു ചെയ്‌തെന്ന് റിപ്പോര്‍ട്ടുകള്‍ ഉണ്ടായിരുന്നു. ഇതിനു തൊട്ടുപിന്നാലെയാണ് തരൂരിനെ പ്രനിധി സംഘത്തില്‍ ഉള്‍പ്പെടുത്തിയത്. പ്രതിനിധി സംഘങ്ങളില്‍ ഒന്നിനെ തരൂര്‍ നയിക്കുമെന്നും റിപ്പോര്‍ട്ടുകള്‍ ഉണ്ട്. കോണ്‍ഗ്രസ് നേതൃത്വം താക്കീതു ചെയ്‌തെന്ന തരത്തിലുള്ള വാര്‍ത്തകള്‍ കഴിഞ്ഞ ദിവസം ശശി തരൂര്‍ നിഷേധിച്ചിരുന്നു.