കുവൈത്ത് സിറ്റി: കുവൈത്തില്‍ വെച്ച് വിവാഹിതരാവാന്‍ പദ്ധതിയിടുന്ന പ്രവാസികള്‍ക്കും വിവാഹ പൂര്‍വ വൈദ്യ പരിശോധനകള്‍ നിര്‍ബന്ധമാക്കി കുവൈത്ത് ആരോഗ്യ മന്ത്രാലയം. ഇതു സംബന്ധിച്ച 2008 ലെ 31-ാം നമ്പര്‍ നിയമത്തിലെ പുതുക്കിയ എക്‌സിക്യൂട്ടീവ് ചട്ടങ്ങള്‍ക്ക് ആരോഗ്യമന്ത്രി ഡോക്ടര്‍ അഹമ്മദ് അല്‍ അവാദി അംഗീകാരം നല്‍കിയതായി ആരോഗ്യ മന്ത്രാലയം മന്ത്രാലയം പ്രസ്താവനയിലൂടെ അറിയിച്ചു.

കുവൈത്തില്‍ ഇത്രയുംകാലം വിവാഹിതരാകാന്‍ പോവുന്ന സ്വദേശികള്‍ക്കു മാത്രമായിരുന്നു വിവാഹ പൂര്‍വ പരിശോധനകള്‍ നിര്‍ബന്ധമാക്കിയിരുന്നത്. എന്നാല്‍ നിയമത്തിലെ പുതിയ ഭേദഗതിയോടെ കുവൈത്തില്‍ വെച്ച് വിവാഹിതരാവുന്ന പ്രവാസികള്‍ക്കും ഈ പരിശോധന ബാധകമാകും. പുതുക്കിയ നിയമ ഭേദഗതി ഔദ്യോഗിക ഗസറ്റില്‍ പ്രസിദ്ധീകരിച്ച് ഏപ്രില്‍ ഒന്നിനു ശേഷം മാത്രമേ ഈ പുതുക്കിയ ചട്ടങ്ങള്‍ പ്രാബല്യത്തില്‍ വരുമെന്ന് ആരോഗ്യ മന്ത്രാലയം അറിയിച്ചു.

കുവൈത്തിലെ ആരോഗ്യ സേവനങ്ങളുടെ ഗുണനിലവാരം വര്‍ധിപ്പിക്കുക, സമൂഹത്തിലെ ജനിതക, പകര്‍ച്ചവ്യാധി രോഗങ്ങളുടെ വ്യാപനം തടയുക, പൊതുജനാരോഗ്യം സംരക്ഷിക്കുക എന്നിവയാണ് വിവാഹ പൂര്‍വ വൈധ്യ പരിശോധനകളിലൂടെ ആരോഗ്യ മന്ത്രാലയം ലക്ഷ്യമിടുന്നത്. 

പുതുക്കിയ നിയമത്തില്‍ വിവാഹ പൂര്‍വ വൈധ്യ പരിശോധനകള്‍ കക്ഷികളുടെ ദേശീയത പരിഗണിക്കാതെ എല്ലാവര്‍ക്കും നിര്‍ബന്ധമാക്കി. ഇതുപ്രകാരം വിവാഹ പൂര്‍വ വൈധ്യ പരിശോധനകളില്‍ കുവൈത്തില്‍ നടക്കുന്ന എല്ലാ വിവാഹങ്ങളും ഉള്‍പ്പെടും. ഇതില്‍ വധുവും വരനും കുവൈത്ത് പൗരന്‍മാരാണെങ്കിലും ഇവരില്‍ ഒരാള്‍ കുവൈത്ത് പൗരന്‍ അല്ലെങ്കില്‍ പൗരയും മറ്റേയാള്‍ വിദേശിയും അല്ലെങ്കില്‍ രണ്ടു പേരും കുവൈത്ത് പൗരന്‍മാര്‍ അല്ലാത്തവരും ആവുന്ന കേസുകളിലും വിവാഹ പൂര്‍വ വൈധ്യ പരിശോധന നിര്‍ബന്ധമാകും. വിവാഹം കഴിക്കുന്നതിനു മുമ്പായി വധൂ വരന്‍മാരെ വൈധ്യ പരിശോധനകള്‍ക്ക് വിധേയരാക്കുകയും ഏതെങ്കിലും രീതിയിലുള്ള ഗുരുതരമായ ആരോഗ്യ പ്രശ്‌നങ്ങള്‍ അവരെ ബാധിച്ചിട്ടുണ്ടോ എന്ന് കണ്ടെത്തുകയുമാണ് പ്രധാനമായും ഇതിലൂടെ ലക്ഷ്യമിടുന്നത്.