ന്യൂഡൽഹി: ഡൽഹി നിയമസഭാ തിരഞ്ഞെടുപ്പിൽ ബി.ജെ.പി. വിജയം കൈവരിച്ചതിന് പിന്നാലെ പശ്ചിമ ബംഗാൾ മുഖ്യമന്ത്രി മമതാ ബാനർജിക്ക് താക്കീതുമായി ബംഗാളിലെ പ്രതിപക്ഷ നേതാവും ബിജെപി നേതാവുമായ സുവേന്ദു അധികാരി. ഞങ്ങൾ ഡൽഹിയിൽ വിജയിച്ചിരിക്കുന്നുവെന്നും, ഇനി 2026-ൽ പശ്ചിമ ബംഗാൾ പിടിക്കുമെന്നുമാണ് സുവേന്ദുവിൻ്റെ പ്രഖ്യാപനം. കാത്തിരുന്നോളൂ, അടുത്തത് നിങ്ങളാണെന്നും മമതാ ബാനർജിക്കുള്ള താക്കീതായി അദ്ദേഹം പറഞ്ഞു.

മറ്റൊരു ബി.ജെ.പി നേതാവായ സുകാന്ത മജുംദാറും സമാന പ്രസ്താവന നടത്തിയിട്ടുണ്ട്. അടുത്ത നിയമസഭാ തിരഞ്ഞെടുപ്പിൽ പശ്ചിമ ബംഗാളിലെ ആളുകളും ബി.ജെ.പിക്കും വോട്ട് ചെയ്യുമെന്നാണ് അദ്ദേഹം പറയുന്നത്. നിങ്ങൾ വോട്ട് ചെയ്‌തത്‌ ബി.ജെ.പിക്കാണോ അതോ മമതാ ബാനർജി പിന്തുണയ്ക്കുന്ന എ.എ.പിക്കാണോ എന്ന് അറിയില്ല. എന്നാലും ഡൽഹിയിലെ പശ്ചിമ ബംഗാൾ സ്വദേശികൾക്ക് ഈ വിജയത്തിൽ നന്ദി പറയുന്നുവെന്നും സുകാന്ത മജുംദാർ പറഞ്ഞു.

നീണ്ട 27 വർഷങ്ങൽക്ക് ശേഷമാണ് ദേശീയ തലസ്ഥാനമായ ഡൽഹിയിൽ ബി.ജെ.പിക്ക് അധികാരം ലഭിക്കുന്നത്. ഡൽഹിയിലെ 70 നിയമസഭാ സീറ്റുകളിൽ 48 എണ്ണത്തിലും വിജയിച്ചാണ് ബി.ജെ.പി. അധികാരത്തിലെത്തിയത്. 2020-ലെ തിരഞ്ഞെടുപ്പിൽ 62 സീറ്റുകൾ നേടി അധികാരത്തിലെത്തിയ നിലവിലെ ഭരണകക്ഷിയായ ആം ആദ്‌മി പാർട്ടിയെ 22 സീറ്റിലേക്ക് ചുരുക്കാനും ബി.ജെ.പിക്ക് സാധിച്ചിരുന്നു. അതേസമയം, കോൺഗ്രസിന് ഇത്തവണയും സീറ്റുകൾ ഒന്നും ലഭിച്ചില്ല.

ഡൽഹിയിലേത് പോലെ തന്നെ ബി.ജെ.പിയുടെ പ്രധാന ലക്ഷ്യങ്ങളിലൊന്നാണ് പശ്ചിമ ബംഗാൾ. 2026 ഏപ്രിലിൽ നടക്കാനിരിക്കുന്ന തിരഞ്ഞെടുപ്പ് മുന്നിൽ കണ്ടാണ് ഇപ്പോൾ നേതാക്കൾ മുന്നറിയിപ്പുമായി എത്തിയിരിക്കുന്നത്. മമതാ ബാനർജിയും അവർ നേതൃത്വം നൽകുന്ന തൃണമൂൽ കോൺഗ്രസുമാണ് ബി.ജെ.പിയുടെ പ്രധാന എതിരാളികൾ. 2019, 2024 ലോക്സഭാ തിരഞ്ഞെടുപ്പിലും 2021-ലെ നിയമസഭാ തിരഞ്ഞെടുപ്പിലും തൃണമൂൽ ബി.ജെ.പിയെ പ്രതിരോധിച്ചത് മമതയുടെ നേതൃത്വത്തിലാണ്.

BJP leader Suwendhu Adhikari has taken a jibe at West Bengal Chief Minister Mamata Banerjee, hinting that the BJP's next focus will be on the state, following its recent successes.