ഇംഗ്ലണ്ടിനെതിരായ രണ്ടാം ഏകദിനത്തിൽ ഇന്ത്യ നാല് വിക്കറ്റുകളുടെ തകർപ്പൻ വിജയമാണ് ഇന്ത്യ സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത ഇംഗ്ലണ്ട് 49.5 ഓവറിൽ 304 റൺസിന്‌ പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഇന്ത്യ നാല് വിക്കറ്റുകൾ ബാക്കിനിൽക്കെ ലക്ഷ്യം മറികടക്കുകയായിരുന്നു. 

എന്നാൽ മത്സരത്തിൽ വിരാട് കോഹ്‌ലി നിരാശാജനകമായ പ്രകടനമാണ് നടത്തിയത്. എട്ട് പന്തിൽ അഞ്ചു റൺസ് മാത്രമാണ് കോഹ്‌ലിക്ക് നേടാൻ സാധിച്ചത്. ഇപ്പോൾ കോഹ്‌ലിക്ക് പഴയ ഫോമിലേക്ക് തിരിച്ചെത്താനായി ഒരു നിർദ്ദേശം നൽകിയിരിക്കുകയാണ് മുൻ ശ്രീലങ്കൻ ക്യാപ്റ്റൻ അർജുന രണതുംഗ. മുൻ ഇന്ത്യൻ താരങ്ങളായ സുനിൽ ഗവാസ്‌കർ, ദിലീപ് വെങ്ങസാർക്കർ, രാഹുൽ ദ്രാവിഡ് എന്നിവരുമായി കോഹ്‌ലി സംസാരിക്കണമെന്നാണ് അർജുന രണതുംഗ പറഞ്ഞത്. 

'സുനിൽ ഗവാസ്കർ, ദിലീപ് വെങ്‌സർക്കാർ, രാഹുൽ ദ്രാവിഡ് തുടങ്ങിയവരോട് കോഹ്‌ലി സംസാരിക്കണം. അതാണ് അദ്ദേഹത്തിന് ചെയ്യാൻ കഴിയുക. അവർക്ക് തീർച്ചയായും കൊഹ്‍ലിയെ സഹായിക്കാൻ സാധിക്കും. ഇത്രയധികം റൺസ് നേടിയ കോഹ്‌ലിയെപ്പോലെയുള്ള ഒരു താരത്തിന്റെ വിരമിക്കൽ അദ്ദേഹം തന്നെ തീരുമാനിക്കേണ്ട കാര്യമാണെന്ന് ഞാൻ കരുതുന്നു. എന്തിനാണ് ഇപ്പോഴും അദ്ദേഹത്തിൽ ശ്രദ്ധ കേന്ദ്രീകരിക്കുന്നത്? ഇത് അനാവശ്യമാണെന്ന് എനിക്ക് തോന്നുന്നു. എപ്പോൾ വിരമിക്കണമെന്ന് അദ്ദേഹത്തിന്റെ തീരുമാനമാണ്. അദ്ദേഹം എപ്പോൾ വേണമെങ്കിലും അത് തീരുമാനിക്കട്ടെ,' മുൻ ശ്രീലങ്കൻ താരം ദി ദി ടെലിഗ്രാഫിന് നൽകിയ അഭിമുഖത്തിൽ പറഞ്ഞു. 

മത്സരത്തിൽ രോഹിത് ശർമ്മയുടെ സെഞ്ച്വറി കരുത്തിലാണ് ഇന്ത്യ വിജയം സ്വന്തമാക്കിയത്. 90 പന്തിൽ 119 റൺസാണ് രോഹിത് അടിച്ചെടുത്തത്. 12 ഫോറുകളും ഏഴ് സിക്സറുകളും അടങ്ങുന്നതായിരുന്നു രോഹിത്തിന്റെ തകർപ്പൻ ഇന്നിങ്‌സ്. ശുഭ്മൻ ഗിൽ അർദ്ധ സെഞ്ച്വറി നേടിയും വിജയത്തിൽ നിർണായകമായി. 50 പന്തിൽ 60 റൺസാണ് ഗിൽ നേടിയത്. ഒമ്പത് ഫോറുകളും ഒരു സിക്സുമാണ് താരം നേടിയത്. വിജയത്തോടെ മൂന്ന് മത്സരങ്ങളുടെ പരമ്പര 2-0ത്തിന് സ്വന്തമാക്കാനും ഇന്ത്യക്ക് സാധിച്ചു. ഫെബ്രുവരി 12നാണ് പരമ്പരയിലെ അവസാന മത്സരം നടക്കുന്നത്. അഹമ്മദാബാദിലാണ് മത്സരം നടക്കുക.