കൊച്ചി: എറണാകുളം, പാലക്കാട് ജില്ലകളിലായി വാഹനാപകടം. എറണാകുളം പത്തടിപ്പാലത്ത് കെഎസ്ആര്‍ടിസി സ്വിഫ്റ്റ് ബസ്സും ലോറിയും കൂട്ടിയിടിച്ചാണ് അപകടമുണ്ടായത്. പാലക്കാട് പനയംപാടത്ത് ബൈക്ക് കാല്‍നട യാത്രക്കാര്‍ക്കിടയിലേക്ക് പാഞ്ഞ് കയറിയാണ് അപകടമുണ്ടായത്. 

കെഎസ്ആര്‍ടിസി അപകടത്തില്‍ ബസ്സിലെ ഡ്രൈവറും യാത്രക്കാരുമടക്കം എട്ടോളം പേര്‍ക്ക് പരിക്കേറ്റു. ഗുരുതരമായി പരിക്കേറ്റ ഡ്രൈവറെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. രാത്രി 9.45 ഓടുകൂടിയാണ് അപകടമുണ്ടായത്. എറണാകുളം ഭാഗത്തേക്ക് പോവുകയായിരുന്ന ലോറിക്ക് പിന്നില്‍ ബസ് ഇടിക്കുകയായിരുന്നു. പൊലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്. 

പനയംപാടത്ത് രണ്ട് മാസം മുന്‍പ് നാല് സ്‌കൂള്‍ കുട്ടികളുടെ മരണത്തിന് ഇടയാക്കിയ വളവിലാണ് ഇന്ന് വീണ്ടും അപകടമുണ്ടായിട്ടുള്ളത്. പാലക്കാട് കോഴിക്കോട് ദേശീയപാതയിലാണ് സംഭവം. വൈകീട്ട് ആറുമണിയോടെ പാലക്കാട് ഭാഗത്തേക്ക് പോവുകയായിരുന്ന ബൈക്ക് വളവില്‍ നിയന്ത്രണം നഷ്ടപ്പെട്ട് തെന്നി വീഴുകയായിരുന്നു.
 
ഈ സമയം സമീപത്തുണ്ടായിരുന്ന പനയമ്പാടം സ്വദേശി മുസ്തഫക്കും മറ്റൊരാള്‍ക്കുമാണ് പരിക്കേറ്റത്. ഗുരുതര പരിക്കേറ്റ ഇവരെ പെരിന്തല്‍മണ്ണയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

ഇക്കഴിഞ്ഞ ഡിസംബറിലായിരുന്നു ഇതേ വളവില്‍ ലോറി നിയന്ത്രണം വിട്ട് മറിഞ്ഞ് നാല് സ്‌കൂള്‍ വിദ്യാത്ഥികള്‍ മരിച്ചത്. സുരക്ഷയ്ക്കായി താല്‍ക്കാലിക സംവിധാനങ്ങള്‍ മാത്രമാണ് ഇവിടെ സ്ഥാപിച്ചതെന്ന ആക്ഷേപം ഉയന്നിരുന്നു.  

people were injured in accidents happen in Ernakulam and Palakkad road