അഹമ്മദാബാദ്: ഇംഗ്ലണ്ടിനെതിരെയുള്ള ഏകദിന പരമ്പരയിലെ അവസാന മത്സരവും വിജയിച്ചുകൊണ്ട് ഇന്ത്യ പരമ്പര 3-0ത്തിന് സ്വന്തമാക്കിയിരുന്നു. മത്സരത്തിൽ 142 റൺസിന്റെ തകർപ്പൻ വിജയമാണ് ഇന്ത്യ സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത ഇന്ത്യ 356 റൺസാണ് നേടിയത്. വിജയലക്ഷ്യം പിന്തുടർന്ന ഇംഗ്ലണ്ട് 214 റൺസിൽ ഓൾ ഔട്ടാവുകയായിരുന്നു. 

മത്സരത്തിൽ ഇന്ത്യക്കായി തകർപ്പൻ പ്രകടനമാണ് ശ്രേയസ് അയ്യർ നടത്തിയിരുന്നത്. 64 പന്തിൽ നിന്ന് 78 റൺസ് നേടിയാണ് അയ്യർ തിളങ്ങിയത്. എട്ട് ഫോറുകളും രണ്ട് സിക്‌സും അടങ്ങുന്നതായിരുന്നു താരത്തിന്റെ ഇന്നിങ്‌സ്. ഏകദിന ക്രിക്കറ്റിലെ അയ്യറിന്റെ 25 50+ സ്കോറായിരുന്നു ഇത്. ഇതിനോടകം തന്നെ 20 അർദ്ധ സെഞ്ച്വറികളും അഞ്ചു സെഞ്ച്വറികളും അയ്യർ വൈറ്റ് ബോൾ ക്രിക്കറ്റിൽ നേടിയിട്ടുണ്ട്. 

ഇതോടെ ഏകദിനത്തിൽ ഏറ്റവും വേഗത്തിൽ 25 50+ സ്കോറുകൾ നേടുന്ന ഇന്ത്യൻ താരമെന്ന റെക്കോർഡും അയ്യർ സ്വന്തമാക്കി. വെറും 60 ഇന്നിങ്സുകളിൽ നിന്നുമാണ് ശ്രേയസ് ഈ നേട്ടം സ്വന്തമാക്കിയത്. 68 ഇന്നിങ്സുകളിൽ നിന്നുമായി ഈ നേട്ടം സ്വന്തമാക്കിയ നവ്‌ജ്യോത് സിംഗ് സിദ്ധു, വിരാട് കോഹ്‌ലി എന്നിവരെ മറികടന്നാണ് അയ്യർ ഈ നേട്ടം സ്വന്തമാക്കിയത്. 69 ഇന്നിങ്‌സുകളിൽ നിന്നും ഈ നേട്ടം സ്വന്തമാക്കിയ കെഎൽ രാഹുൽ 72 ഇന്നിങ്‌സുകളിൽ നിന്നും ഈ നേട്ടത്തിലെത്തിയ ശിഖർ ധവാൻ എന്നിവരാണ് യഥാക്രമം മൂന്നും നാലും സ്ഥാനങ്ങളിൽ ഉള്ളത്. 

കാലങ്ങൾക്ക് ശേഷം ഇന്ത്യൻ ടീമിലേക്ക് തിരിച്ചെത്തിയ അയ്യർ പരമ്പരയിൽ ഉടനീളം തകർപ്പൻ പ്രകടനമായിരുന്നു നടത്തിയിരുന്നത്. രണ്ട് ഫിഫ്‌റ്റികളാണ് അയ്യർ ഇംഗ്ലണ്ടിനെതിരെ നേടിയത്. താരത്തിന്റെ ഈ മിന്നും പ്രകടനം വരാനിരിക്കുന്നൻ ചാമ്പ്യൻസ് ട്രോഫിയിലും അവർത്തിക്കുമെന്നാണ് പ്രതീക്ഷിക്കുന്നത്. 

2023 ഐസിസി ഏകദിന ലോകകപ്പിലും തകർപ്പൻ പ്രകടനം ആയിരുന്നു ശ്രേയസ് അയ്യർ നടത്തിയിരുന്നത്. ഇന്ത്യയെ ആ ടൂർണമെന്റിൽ ഫൈനലിൽ എത്തിക്കുന്നതിൽ അയ്യർ വഹിച്ച പങ്ക് വളരെ വലുതായിരുന്നു ടൂർണമെന്റിൽ 530 റൺസ് ആയിരുന്നു താരം അടിച്ചെടുത്തത്. ഐപിഎൽ മെഗാ ലേലത്തിൽ 26.5 കോടിക്ക് ശ്രേയസിനെ പഞ്ചാബ് കിങ്‌സ് ആണ് അയ്യരെ സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്.