ന്യൂഡല്‍ഹി: നാഗ്പൂരിലേതിനെക്കാള്‍ വലിയ ആസ്ഥാനം ഡല്‍ഹിയില്‍ തുറന്ന് ആര്‍.എസ്.എസ്. ഡല്‍ഹി ജണ്ടേവാലയില്‍ ആണ് നാല് ഏക്കറില്‍ വ്യാപിച്ചുകിടക്കുന്ന പുതിയ ആസ്ഥാനമന്ദിരം ആര്‍.എസ്.എസ് തുറന്നത്. 150 കോടി രൂപ ചെലവിട്ടാണ് അഞ്ച് ലക്ഷം ചതുരശ്ര അടി വിസ്തീര്‍ണമുള്ള 12 നിലകള്‍ വീതമുള്ള മൂന്ന് കെട്ടിടങ്ങള്‍ നിര്‍മിച്ചത്. 270 കാറുകള്‍ നിര്‍ത്താനുള്ള പാര്‍ക്കിങ് ഏരിയ, 1,300ലേറെ പേര്‍ക്ക് ഇരിക്കാവുന്ന മൂന്ന് അത്യാധുനിക ഓഡിറ്റോറിയങ്ങള്‍, ലൈബ്രറി, അഞ്ച് കിടക്കകളുള്ള ക്ലിനിക്ക്, ഹനുമാന്‍ ക്ഷേത്രം എന്നിവകൂടി ഉള്‍പ്പെടുന്നതാണ് ആര്‍.എസ്.എസ് ആസ്ഥാനം. 
എട്ട് വര്‍ഷമായി ന്യൂഡല്‍ഹിയോട് ചേര്‍ന്നുള്ള ജണ്ടേവാലയില്‍ ഉദാസീന്‍ ആശ്രമത്തിലാണ് ആര്‍.എസ്.എസ് ഓഫിസ് പ്രവര്‍ത്തിച്ചിരുന്നത്. സെപ്റ്റംബര്‍ മുതല്‍ പുതിയ കെട്ടിടത്തിലേക്ക് ഘട്ടംഘട്ടമായി മാറിത്തുടങ്ങിയെങ്കിലും ബുധനാഴ്ചയാണ് ഇത് പൂര്‍ണ്ണമായും ഒഴിയുകയും പുതിയ ആസ്ഥാനം സമ്പൂര്‍ണ പ്രവര്‍ത്തനസജ്ജമാകുകയുംചെയ്തത്. ഈ മാസം 19നാണ് ഉദ്ഘാടനം നടക്കുന്നത്. പരിപാടിയില്‍ ആര്‍.എസ്.എസ് മേധാവി മോഹന്‍ ഭാഗവത്, ജനറല്‍ സെക്രട്ടറി ദത്താത്രേയ ഹൊസബൊളെ എന്നിവര്‍ പങ്കെടുക്കും.

സാധന, പ്രേരണ, അര്‍ച്ചന എന്നിങ്ങനെയാണ് കശവ് കുഞ്ച് കുഞ്ച് എന്ന പേരിലുള്ള ആസ്ഥാനത്തിന്റെ മൂന്ന് പുതിയ ടവറുകള്‍ക്ക് നല്‍കിയ പേര്. സാധനയിലാണ് ആര്‍.എസ്.എസിന്റെ എല്ലാ ഓഫിസുകളും പ്രവര്‍ത്തിക്കുന്നത്. പ്രേരണയും അര്‍ച്ചനയും റെസിഡന്‍ഷ്യല്‍ കോംപ്ലക്‌സുകളാണ്. പുല്‍ത്തകിടിയില്‍ ആര്‍.എസ്.എസ് സ്ഥാപകന്‍ ഹെഡ്‌ഗേവാറിന്റെ പ്രതിമയുണ്ട്. ഡല്‍ഹി ദീന്‍ ദയാല്‍ ഉപാധ്യായ മാര്‍ഗില്‍ നാലുവര്‍ഷം മുമ്പ് തുറന്ന ബി.ജെ.പി കേന്ദ്ര ആസ്ഥാനത്തേക്കാള്‍ വലിപ്പമുണ്ട് ആര്‍.എസ്.എസ് ആസ്ഥാനത്തിന്. ഗുജറാത്ത് സര്‍ക്കാരിന്റെ പ്രവൃത്തികള്‍ ഏറ്റെടുത്ത് നടത്തുന്ന ആര്‍ക്കിടെക്റ്റ് അനൂപ് ദവേ ആണ് ആര്‍.എസ്.എസ് ഓഫിസ് രൂപകല്‍പന ചെയ്തത്.

RSS opened a new office at a cost of Rs 150 crore in New Delhi